Jordan-in inthlan zawhah lockdown puang dawn

Jordan prime minister Bisher Khasawneh chuan Pathianni khan an rama inthlanpui, parliamentary election neih zawh a nih veleh ni nga chhung atan lockdown hman nghal tur a nih thu a sawi.

Lockdown hi November 11 tlai dar 5 aṭang hman ṭan tur a ni a, ni nga chhung a awh ang. Ruahman lawk dan chuan Jordan-ah hian November 10-ah parliamentary election neih tur a ni a, inthlan zawh tuk tlai aṭangin lockdown hi an hmang nghal dawn a ni. 

Jordan health ministry chuan Pathianni khan an ramah Covid-19 hri kai thar chu mi 3,259 an awm thu a tarlang a, anni nen hian Jordan-a hri kai tawh zawng zawng hi mi 75,866 an ni. Pathianni vek khan he hri vanga thi hi mi 37 an awm a, hripui thihpui hi mi 866 an awm tawh. 

Hri leng hian ziaawm lam a pan mai loh avangin sorkar chuan inkhuah­khrihna a tichhuak nghal bawk a, mi tam tak pun­khawm khap a ni a, darkar khatin curfew hun chhung chu pawhsei belh niin, gym leh amusement park-te chu khar a ni bawk. Police patrol (duty) te pawh siam belh a ni a, police-te hian hmaituam lo a pawnchhuak te chu an vai ṭhin bawk a ni. 

Heng inkhuahkhirhna tharte hi nimin aṭanga hman nghal a nih tur thu Khasawneh chuan a sawi a, sorkarin dan a siamte hi zawm ṭha hram hram turin mipuite chu a ngen bawk.