Vawiinah US President thar thlang dawn

Khawvel ngaihven rawn, US President thar chu vawiin, November 3 hian an thlang dawn ta. 

Ram ropui leh thiltithei, US President thlan hian an ram chauh ni lo, khawvel ram dangte nena an inlaichinna thlenga a nghawng tel ṭhin avangin ram dangte ngaihven a hlawh reng a ni. 

US political system hi party lian pahnih, Republican party leh Demo­cratic party-in a awp a ni a, President ni tawh  ho pawh a khawi zawk zawk party member emaw an la ni ziah a ni. 

Republican Party, Grand Old Party (GOP) tia sawi bawk hi conservative political party niin, kumina an party presidential candidate chu US President ni lai, Donald Trump a ni. Rural America-ah thlawptu a nei ṭha zual a ni.

Democrats hi liberal political party a ni a, an presidential candidate Joe Biden hi kum riat chhung President hlui Barack Obama hnuaia vice president dinhmun lo chelh tawh a ni. Democratic Party hian urban America-ah thlawptu a nei ṭha thung. 

Kumina President candidate-te hi kum 70 chuang ve ve tawh niin, Trump hi kum 74 a ni a, Biden hi kum 77 mi a ni tawh bawk. President hi electoral college vote hmanga thlan tlin a ni ang. 

US President thlangtu, Electoral college-ah hian vote 538 awmin,  vote 270 hmuh phak a ngai. Electoral College-a state tinte vote neih theih zat hi an state mipui tam dan azirin siam a ni.  Mipui nawlpuiten President thlang hian vote thlak ve tho mah se, mipui vote, popular vote tia sawi hmu tam zawk chu a tling ziah chuang lo. Kum 2016 inthlanah khan Democrats Hillary Clinton chuan a khingpui, Republican Donald Trump aiin popular vote a hmu tam zawk a, mahse Trump hian electoral college vote a hmuh tam zawk avangin US President a ni ta tho a ni. 

State tam zawkah chuan winner-takes-all rule hman a ni a, hemi awmzia chu popular vote-a hmu sang ber candidate tan state electoral college vote pek vek a ni. 

State eng emaw zatah party chak zawk tur hriat mai theih a nih rualin, state ṭhenkhat erawh chu chak zawk tur hriat thei mai loh, battleground state tih an awm bawk. heng state-te hi swing state tih an ni ṭhin bawk a, Democrats leh Republicans inhneh tawk fona leh inchak chhawkna te an ni ṭhin. Battleground state ni reng zingah hian Florida leh Ohio an tel a, tun hma lama Republican lam chakna ni ṭhin, Arizona leh Texas-te chuDemocratic Party thlawptu an pun chhoh nasat avangin kuminah chuan battleground state zingah chhiar tel an ni bawk. 

US khua leh tui, kum 18 tling chin chuan kum li dana President thlannaah hian vote an thlak thei vek a ni. Hetih lai hian vote thlak duh lo leh peih lo an tam ṭhin hle. Kum 2016 inthlanah khan vote nei mi maktaduai 245 an awm laiin, vote thlak hi mi mtd 140 an tling pha lo. 

US Census Bureau chuan mi tam tak chuan politics lam an ngaihven peih lo tiin vote thlak tur pawhin an in register lo a, in register zingah pawh candidate an neihte an duh lo tia vote thlak leh duh lo pawh ṭhahnem tak an awm a ni, a ti. 

Vote tlate chhiar kim vek tur chuan ni eng emaw zat a duh ṭhin a, mahse President thlan thar tur chu Electoral College vote-a innghat a nih avangin vote thlak tukah hriat nghal theih a ni ṭhin. 

Kum 2016 inthlanah khan Donald Trump chuan inthlan tuk zing dar 3-ah victory speech a nei hman a ni. 

Hemi rual hian kumina postal ballot hmang an tam avangin official result erawh nghah rei a la ngai maithei. Polling station-a vote thlak emaw, postal ballot hmang emaw vote thlak hi pawm ve ve a ni a, kuminah hian hripui leng vangin  ṭum dang aiin postal ballot hmang hi an tam zawk.  

Kum 2000 inthlanah khan result tihchian mai theih a ni lo a, Supreme Court a rawn inrawl hnuah chauh a chak zawk tihchian a ni thei a ni. He inthlanah hian Republican candidate George W Bush leh Democratic candidate Al Gore te an inkhing a, an vote hmuh zat a inhnaih hle a, Florida result-ah an innghat a, hei vang hian vote chhiar ṭhat te phut a ni. Mahse Surpeme Court inrawlhin, Florida electoral college vote 25 chu Bush-a pe vekin, Bush hian vote 271 hmuin tlingah puan a ni thei ta chauh a ni. Al Gore hian popular vote hmu tam zawk mah se a chak zo ta lo a ni. 

President thar hi kum thar January 20 ( Pathianni a nih chuan January 21-ah zawk) Washington DC-a Capitol building-ah lakluh a ni ṭhin. 

Lakluh inkhawm hman zawh hnuin, President thar hian White House-ah a office a luah ṭan nghal a ni.

 

President thar lakluh hmain a vice president chu rinawmna thu tiamtira lakluh hmasak a ni ṭhin a, a hnuah President thar hi lakluh a ni. Lakluh inkhawm hi Joint Congressional Committee on Inaugural Ceremonies (JCCIC) in a ruahman ṭhin. President thar hian Bible-a kut nghatin rinawmna thu an tiam ṭhin a, hetihlai hian US President zingah thu tiam dawna Bible hmang lo pathum an awm tawh. Theodore Roosevelt chuan Bible a hmang lo a, John Quincy Adam chuan Law lehkhabu chungah a kut a nghat a, Lydon B Johnson chuan Roman Catholic missal (Mass atana an hman ṭhin) a hmang bawk.