Myanmar-a nawrh huaihawt zinga Mi 8 an thi leh
Myanmar security force-te chuan Pathianni khan lungawi lohna lantira pungkhawm zinga mi pariat an kaphlum leh. Thla thum chuang chu sipai rorelna duh lohna lantirin khawpui hrang hrangah nawrh huaihawt a ni tawh a ni.
Pathianni khan Myanmar khawpui hrang hrangah mi sang tel pungkhawmin "Global Myanmar Spring Revolution" neih a ni a, Myanmar ram pawnah pawh sipai rorelna duh lohna lantirin rally-te neih a ni bawk. Pope Francis chuan tharum thawh zawnga che lo turin mipuite a chah.
Sipai ten mi pariat an kahhlum zinga pahnih hi Mandalay khuaa mi an ni a, Wetlet khuaah mi pathum kahhlum an ni bawk. Shan state-ah mi pahnih leh Hpakant khuaah mi pakhat kahhlum an ni bawk tih ramchhunga news group-te chuan an tarlang.
Sipaiten February 1-a Aung San Suu Kyi kaihhruai National League for Democracy (NLD) sorkar thuneihna an hnehchhuh hnuah ram mipui ten lungawi lohna kawng hrang hrang in an la lantir chhunzawm reng a ni. Sipaite chuan nawrh huaihawt zinga eng emaw zat kaphlum tawhin, mi sang tel an man tawh bawk. Tualchhung buaina a chhuah hnuah ramri bula sipai leh helpawlte inbeihna pawh a hluar chho leh a, an ram hmarlam leh khawchhak ramri lamah raltlan ṭhahnem tak an awm tawh a ni.
Pathiannia Yangon ṭhalai pungkhawmte chuan sipai rorelna titawp tura kalkhawm an nih thu an sawi a, 'three-finger salute' hmuhin, engkawng maha tlawm an tum loh thu an sawi.
Assistance Association for Political Prisoners (AAPP) chuan ram chhung buaina chhuah hnuah security force ten lungawilohna lantirtu zinga mi 765 thatin mi 4,609 vel an man tawh niin a tarlang. Mahse sipai sokar chuan AAPP hi phalna nei loa pawl din niin a puh a, buaina chhuaka thi hi mi 258 niin an zingah hian police 17 leh sipai pasarih an tel niin a sawi thung.
Sipai rorelna duh lohna lantira punkhawmna hi Taipei, Vancouver leh London-ah pawh neih a ni a, London-a punkhawmnaah chuan Hong Kong politician Nathan Law pawh a tel.
Pope Francis pawhin Pathiannia St Peter's Square-a mass a buatsaihah Myanmar ram tan a ṭawngtai sak a, boruak ṭha leh muanawm a awm theihna atan a dilsak a ni.