Colombia President-in chhiah siamṭhat tumna sut

Colombia president Ivan Duque chuan a kaihhruai sorkarin chhiah lak dan siamṭhat tura ruahmanna a siam chu an ram mipuite duh lohna nasa tak an lantir hnuin a sut tih Thawhṭanni khan a puang.

President Duque chuan video kaltlanga thu sawiin, Congress hnenah finance ministry-in chhiah lak dan siamṭhat a rawtna hnukkir tur leh, sum lam harsatna an tawh tur pumpelh a nih theihna atan lungrual taka an pawm tlan theih tur dan thar siam chu buaipui nghal tura a hrilh tur thu a sawi.

Right-wing sorkar chuan chhiah lak siamṭhatna dan chu Colombia sum dinhmun sawhnghehna atana thil pawimawh tak a ni tih a sawi a, mahse dan siamṭhat a tumna hia ram mipuiteah lungawi lohna nasa tak a thlen thung a ni.

Dan siamṭhat rawtnaah hian mimal leh sumdawnna neitute hnen aṭanga chhiah lakna tur huam zau zawka siam belh a ni. Mahse hei hi mi tam tak, a bikin working class-te chuan an sawisel nasa hle a, coronavirus leng vanga an ram sum dinhmun tlahniamin a nghawng tawh laia, chhiah lak belhna siam hi an tan phurrit nasa tak a ni dawn tih an sawi.

Human Rights Watch(HRW) chuan tax reform bill duh lohna lantirnaa buaina chhuakah mi paruk an thi tawh ni a sawiin, HRW executive direc­tor Jose Miguel Vivanco chuan muanawm taka lungawi lohna lantir tur leh security force te pawhin mimal dikna zah sak turin a ngen a ni.