Myanmar sipaite'n Japan journalist an man Thu dik lo thehdarha puhna thubuai siamsak

Japan jornalist Yuki Kitazu­mi chu Myanmar buaina chung changa thu diklo thehdarha puhin thubuai siamsak a ni tih Japan embassy chuan a sawi.

Yuki Kitazumi hi Myanmar sipaiten civil sorkar thuneihna an hnehchhuh hnua sipaiten ram pawn mi journalist thubuai an siamsak hmasa ber a ni. He thubuaiah hian thiam loh chantir a nih chuan kum thum chhung a tang dawn niin Japan media te chuan an tarlang.

Kitazumi hi freelance journalist niin, Myanmar tualchhung buaina thleng mek chungchang hi Japan media hnenah a report ṭhin nia sawi a ni. Kum 45 mi niin April 18 khan Yangon khuaa a chennaah police-ten an man a ni. Hemi hma, February 26 khan hun rei vak lo hren a lo ni tawh bawk.

Japan embassy chuan Kitazu­mi hi a hriselna a ṭhat thu sawiin sipaiten an chhuah theihnan hma an la mek tih an sawi.

Sipaite chet dan leh, sipai rorelna duh lohna lantira nawrh huaihawt chungchanga Japan newspaper leh broadcaster-ah a report bakah, Kitazumi hian a social media account lamah Myanmar ram chhung dinhmun hi a tarlang fo bawk. April 12 khan zirlaite nawrh huaihawt chungchangah an huaisena a fakna thute a ziak a, Myanmar mipuite an rama rorelna dik lo tak a dinchan theih lohna turin an nunna thapin hma an la a ni, tih thute a lo ziak tawh a ni.

Myanmar sipaiten civil sorkar thuneihna paihthla a, an rama kum khat chhung atana state of emergency an puan hnuah sipai rorelna duh lohna lantir hian khawpui hrang hrangah nawrh hauihawt chhunzawm reng a la ni. Thuneitute chuan miṭhahnem tak man tawhin thutharthehdarhtu te zalenna pawh rahbeh sak an ni.

Nawrh huaihawtte chunga sipaite chet dan chungchang an report avangin tualchhung journalist-te pawhin man an tawk fo a, tanin a tang ṭhahnem tak an awm mek.

Parcel bomb puakah mi 5 an thi
Myanmar ramah Thawhṭanni zan khan parcel bomb puak vangin mi panga an thi a, an zingah hian Parliament member hlui pakhat leh police officer pathum, civil dis­obedience movement thlawptute an tel niin media-te chuan an tarlang.

Parcel bomb tihpuahna hi Myanmar chhim lam, Western Bago bialah a ni a, Suu Kyi-i party National League For Democracy (NLD) party-a regional lawmaker chu thi zingah hian a tel a ni. Police officer pathum an thih tel bakah, sipai rorelna duh lohna lantirtute thlawptu police officer pakhat pawh bomb puakah hian hliam nasa tak a tuar bawk nia sawi a ni.

Thawhṭanni vek khan Kachin helpawl, Kachin Independence Army chuan sipai helicopter an kapthla niin an sawi. Helpawl ding thar, Chinland Defence Force pawhin nimin khan an Facebook page-ah an mi leh sate chuan Thawhṭanni zan khan Myanmar sipai pali thatin, an inbeihnaah hian sipai 10 velin hliam an tuar tih an sawi bawk.