Egypt-in France siam Rafale fighter jet lei dawn

Egypt chuan France hnen aṭangin Rafale fighter jet 30, US dollar thluklehdingawn 4.5 man lei turin inremna an ziahpui tih Egypt defence ministry chuan Thawhlehni khan a sawi.

France president Emmanuel Macron chuan nikum December khan human rights thuchhuak zahna lantir nan Egypt hnenah ralthuam eng chi mah hralh a tum loh thu leh, tharum thawhna rapthlak zawk a thlen loh nan venpui a ngaih thu a sawi hnuin, inremna hi an nei leh ta tho a ni.

Egypt defence ministry chuan inremna an siama ralthuam an leina senso hi kum 10 chhung loan-a rulh zawh tura tih a nih thu a sawi a, mahse engzata rulh tur nge tih a tarlang chiang lo thung.

Inremna thuthlungte hi April thla tawp khan peih fel a ni tawh a, Egypt palaiten Paris an thlen veleh an inremna siam hi nemngheh a ni ang.

He inremna hian Dassault siam fighter jet tan kawngro tam tak a sut hawng an ring a, January thla khan Greece hnenah Rafale jet 18, USD tld.3.01 man hralhna turin inremna an lo siam fel tawh bawk a ni. France hian Qatar leh India pawh fighter jet lei tur hian inremna lo neihpui tawhin, an ram defence industry ṭhanna kawnga sulsutu pawimawh tak a ni chho zel a ni.

Egypt nena an inremna hian missile siamchhuaktu MBDA leh bungrua semchhuaktu Safran Electronics & Defence lakah contract $ maktaduia 241 a keng tel a ni. France hi kum 2013-2017 chhung Egypt ralthuam mamawh petu ber niin, warplane 24 pawh a lo leitir tawh bawk.