Colombia Finance Minister a bâng

Colombia president Ivan Duque-a'n chhiah lak dan siamṭhat tumna sut a nih thu a puan hnuah finance minister Alberto Carrasquilla chuan minister a nihna aṭanga banna a thehlut ve leh nghal.

Sorkarin chhiah lak dan siamṭhat a tumna hi ram mipuite chuan duh loin, hun eng emaw chen nawrh an lo huaihawt tawh a ni. Mipuiten lungawi lohna an lantir chhunzawm zel avang hian President Duque chuan he ruahmanna hi sut a nih thu Thawhṭanni khan a puang a ni.

Finance minister Carrasquilla chuan banna a thehluh rual hian President-in a sut tak, tax reform hi kaltlangpui a nih loh chuan an ram economy dinhmunin a tuar hle dawn tih a sawi. Chhiah lak dan thar siamah hian sorkarin kum khata chhiah aṭanga a sum lakluh hi USD tld 6 chuang a tling pha thei dawn a ni.

President Duque chuan finance minister atan hian commerce minister, Jose Manuel Restrepo chu dah a ni dawn tih a puang nghal a, tax reform chu an ramin an mamawh thu leh mipui nawlpui, sumdawng leh political party hrang hrangte an pawmtlan theih tur ruahmanna thar siam a ṭul thu a sawi bawk.