Netanyahu-a'n hun pek chhungin Sorkar thar a siam thei lo

Israel prime minister Benjamin Netanyahu hnenah sorkar thar siam tura hun pek chu nimin khan a tawp a, hun pek chhunga sorkar a siam tak loh avangin a khingpui party hnenah hun pek a ni ve leh ang.

Israel ramah hian sorkar thar siam thei an awm loh zel avangin kum hnih chhungin inthlanpui hi ṭum li an nei hman a ni.

Seat 120 awmna Israel parliament, Knesset inthlan neih hnuhnung berah party mala sorkarna siam pha an awm lo leh a, hei vang hian seat la hnem ber Likud party chu sorkar siam turin ni 28 hun pek a ni. Mahse hemi chhung hian Likud party leh a thawhpui party-te chuan sorkar siam tura mamawh seat, member 61 thlawptu an hmu zo ta lo a ni.

President Reuven Rivlin office chuan Netanyahu hian sorkar a siam thei lo tih President a hriattir tawh thu a sawi. Seat la hnem ber dawttu, Yesth Atid party hotu Yair Lapid chu sorkar thar siam turin ni 28 hun pek a ni ve leh dawn tih President chuan a sawi.

Lapid chuan Netanayhu kaihhruai sorkar a din zui tawh lohna Yamina party hotu Naftali Bennett chu ṭangrual sorkar siampui a, prime minister dinhmun pawh inchelh chhawk turin a be tawh tih a sawi.

Hun pek chhungin Lapid hian sorkar thar siam thei tur member a ngah tawk loh chuan President hian Knesset-ah member dang sawm tur thlang turin a ngen leh thei bawk a ni.