US President Joe Biden-a'n July 4-ah An rama puitling 70% vaccine pek hman tum
US President Joe Biden chuan an ram Independence day, July 4 ral hmain an ram mipui puitling chin zinga 70% te chuan Covid-19 vaccine dose khatna pek hman an tum tih a sawi.
July 4-ah hian puitling maktaduai 160 te chu vaccine hi dose kim lak tir hman an tum tih a sawi bawk. US chuan AstraZeneca vaccine dose a kawllai 10% chu Canada, Mexico leh ram dang, hming puanlan loh hnenah July 4 hmaa thawnchhuah a tum bawk a ni.
President Biden chuan coronavirus laka himna chu a kaihhruai rorelna hnuaia an ngaih pawimawh hmasak tur a ni tih a lo sawi fo tawh a ni. Hri leng hian ziaawm lam pawh a pan chho tawh a, America mipuite pawhin punkhawmna lian tham lote chu July 4 hnu lamah chuan an huaihawt theih tawh beiseiin, nunphung pangngaia an nun theihnan hma an la mek tih a sawi.
Biden chuan, " American maktaduai 105 chuangin vaccine an la tawh a, kum lama upa zawk zinga 70% te chuan vaccine dose an la kim tawh bawk. January-a kan dinhmun nena khaikhin chuan thil mak a ni, kumtir khan puitling 2% aia tlem leh kum upa zawk 1% te chauhin dose kimin an la a ni," tiin an hmasawnna chu ropui a tih thu a sawi.
President chuan puitling ṭhahnem tak vaccine la la lo an awm thu sawiin, anmahni lam remchan loh vang emaw harsatna dang an neih vang emawa la lo an nih thu a sawi. Sorkar chuan vaccine chungchanga harsatna neite tan website, vaccine.gov, a siamsak a ni.
US-a pharmacy 40,000-ah sorkar thuchhuak angin walk-in vaccine kalpui a ni dawn tih President chuan a sawi a, state leh tualchhunga thuneitute pawh hemi kawnga thawhpui tur hian a sawm bawk.
US official-te chuan Food and Drug Administration pawmpuinain tleirawl hnenah vaccine pekchhuah an tum a, Centre for Disease Control and Prevention chuan puitling a zatve aia tam hnenah vaccine dose khat pek an ni tawh tih a sawi. US hian nitin vaccine dose 965,000 pe chhuak in, an tum aia a let hnihin an pechhuak chak zawk a ni.
US chuan fur hmain AstraZeneca vaccine an dahkhawl 10% chu ramdang hnenah thawnchhuak turin ruahmanna a siam a, US kuta vaccine awm zat hriat nilo mahse, Associated Press chuan sem chhuah theih mai turin dose maktaduai 60 vel chu a awm niin a tarlang.
White House chuan Brazil tan Covid-19 damdawi, US dollar mtd 20 man thawn a ni dawn tih sawi bawkin, White House Press Secretary Jen Psaki chuan damdawite Pan American Health Organization nena thawkdunin an pek chhuah tur thu a sawi.