NGO 200 chuangin Myanmar sipaite hrek turin UN ngen

Amnesty International leh non-governmental organisation 200 chuang chuan Myanmar rama nawrh huaihawt chunga sipaite rawng taka an chet chhunzawm zel vangin Myanmar sipai sorkarin ralthuam a lakluh theih lohna tura hrekna siam turin United Nations an ngen.

"UN Security Council hian a thuneihna hmang a, Myanmar sipaiten civil mi an thah chhunzawm zel dan leh tihtawp a nih theihna tura hrekna an siam a hun tawh a ni," tiin Amnesty International-a UN advocate Lawrence Moss chuan a sawi.

Moss chuan ram hrang hrangten ṭawngkaa Myanmar sipaite chet dan an dem thu an sawi ringawt chuan nghawng engmah a nei lo, tiin a sawi zui.

Myanmar sipaite hrekna tur hian eng ram mahin silai mu pakhat pawh lei tir lo tura an duh thu sawiin, "Ralthuam lalut thei loa hrekna siam hi sipaiten buaina leh thisen an chhuahnaa Security Council-in a chhan letna tura hmalakna pawimawh a ni," an ti.

February 1-a sipaiten civil sorkar thuneihna an hnehchhuh duh lohna lantir nawrh huaihawt zinga mi 770 vel chu sipai kut tuarin an thi tawh a, mi 4,500 chuang man an ni tawh bawk. Hetih lai hian Myanmar sipai sorkar chuan nawrh huaihawtte chu buaina chawk chhuaktu nia sawiin, thi zat a tarlan pawh an tlem hle thung.

Sipaiten thuneihna an chan hnu, February 24 khan NGO 100 chuang chuan UNSC hnenah Myanmar sipai sorkar tana ralthuam thawn luhte titawp tura hma la turin an lo ngen tawh a ni.

Security Council hian Myanmar chungchangah thuchhuah a lo siam fo tawh a, sipaite chu democracy dan zawm tur te, nawrh huaihawtte tharum hmanga bei let lo turte in a ti a ni. Mahse heng hian awmzia a nei thui lo hle.

NGO-te chuan thuchhuah siam ringawt chu a hun tawh lo tih sawiin, UNSC chuan kawng thara hma a lak a, a taka a chet a ngai tawh a ni, an ti.