Philippines President-in vaccine pawmpui loh China aṭanga lakluh vangin ngaihdam a dil

Phillipines president Rodrigo Duterte chuan China-in vaccine an pawmpui loh, Sinopharm vaccine dose 1,000 an pek chu lalet leh turin a hrilh a, hemi rual Sinovac vaccine chiah Phillippines-a thawn tawh turin a chah.

Sinopharm hi Phillippines-ah pawm ala ni ve lo a, mahse WHO chuan Sinopharm leh Sinovac vaccine hi hman tura a pawmpui beisei a ni.

President Duterte hian Sinopharm vaccine hi a lo la tawh a, hei pawh hi doctor-te thurawn avang chauha la a nih thu a sawi. A vaccine lak chu zirchianna mumal tak a la awm lo a, engtin nge mihring taksaah nghawng a neih dawn hriat a la nih loh avangin a hnung rawn zui lo turin President chuan mipui a chah zui a, amah chauh chu he vaccine la awmchhun ni rih tura a duh thu a sawi. Vaccine la pawm loh a hman chungchanga sawiselna awm pawh chu a pawm thu sawiin, pawi a ti hle tih Duterte chuan a sawi.

China Covid-19 vaccine hi eng ang nge?
China siam, Sinopharm vaccine hi pawm a la ni lo a, side effect hrang hrang a nei theia rin a ni. Chinese vaccine te hi inactivated vaccine an ni a, taksain hri a do letna kawngah live vaccine angin a thawk chak lo nia sawi a ni.

Khawthlang rama siam, Moderna leh Pfizer vaccine te hi mRNA vaccine an ni. He vaccine-ah hian coronavirus genetic code chu mihringah chiu luh niin, kan taksa in viral proteins siam chhuakin natna hrik tam zawk do thei turin a inbuatsaih ṭhin a ni.

Philippines-ah hian tun dinhmunah chuan AstraZeneca leh Sinovac vaccine te chauh pawm an la ni a, frontline worker leh damlo na zualte lak atan an dah.

Covid-19 hri leng hi South East Asia ram zinga Philippines hi tuar na ber te zingah telin, hri kai hmuhchhuah mi maktaduai khat chuang awmin mi 18,000 an thi tawh. Phillippines a cheng zahve dawnin vaccine chu him tawk loa ngaiin an lak duhloh thu tualchhung media chuan a sawi, hei hi kum 2006 a dengue vaccine naupang hnena an sem chungchanga hmingchhiatna an lo neih tawh vangah an ngai bawk.