Hong Kong activist Wong thla 10 dang tan belh dawn

Hong Kong democracy activist, Joshua Wong chu nikum June 4-a phalna nei loa punkhawmna buatsaiha a tel avangin thla 10 dang jail-ah a tan belh dawn.

Kum 24 mi, Wong hi Hong Kong tana national security law siam thar duh lohna lantira vawi tam tak phalna nei loa nawrh huaihawta puh a nih avangin jail-ah a tang mek a ni. Nikum December thla khan kum 2019, June 21-a sorkar dodal zawnga rally huaihawta puhnaah thla 13 leh a chanve tang tura hrem a ni a, hei bakah hian 2019, October thlaa nawrh huaihawt vangin thla li tang turin hrem a lo ni tawh.

Kum 1989-a China sipaiten silai leh tank hmanga Beijing-a Tiannamen Square-a zirlai nawrh huaihawtte an beiha zirlai tam tak an thahte hriatrengna hun chu nikum June 4 khan Hong Kong-ah buatsaih niin, he hunah hian Wong pawh a tel a ni. Hong Kong sorkar chuan hetih hun lai hian hri leng avangin punkhawm khap mah se mi 20,000 dawn an kalkhawm nia sawi a ni. He punkhawmnaa a tel avanga thubuai siamsak hi nimin khan ngaihtuah a ni a, a tirah thla 15 tang tura hremna pek chu Wong ngenna avangin thla 10-ah tihhniam leh a ni. Wong bakah he nawrh huaihawtnaa tel activist dang eng emaw zat chu hremna pek an ni tel bawk.