Maldives-a bomb puakah President hluiin hliam tuar

Maldives President hlui leh parliament speaker nilai Mohamed Nasheed chu Ningani khan an ram khawpui, Male-a bomb puakah hliam a tuar.

Kum 53 mi, Nasheed hi a car-a luh a tum laiin motorcycle lo tlan phei chuan bomb hi rawn tipuakin hliam a tuar tih official-te chuan an sawi.

Official-te chuan bomb tihpuah hi Nasheed thah tumna ni ngeiin an sawi a, hliam chu tuar mah se a dinhmun a ṭhat thu an sawi tel bawk. President hlui hi ADK Hospital-ah enkawl mek a nih thu police-te chuan an sawi a, a hliam dan kimchang erawh an sawilang lo. A bodyguard zinga pakhat pawh damdawi-in panpui a ni bawk.

Official-te chuan Maldives Parliament chawlh lai ni mah se speaker berin beih a tawh avangin emergency meeting koh nghal a ni tih an sawi.

Nasheed hi Amnesty Interna­tional prisoner of conscience hlui niin democracy kalphung hmanga President atana thlan tlin hmasa ber niin, kum 2008 inthlanah khan thlan tlin a ni.

Kum 2012 khan Nasheed-a kaihhruai sorkar chu paihthlak a ni a, kum2015 khan civil rights group hmalaknain firfiaka chetna kaihhnawiha thubuai siamsak a ni a, kum 13 chhung lung-in tang turin an hrem zui a ni. Thiam loh chantir a nih hnuah President Abdulla Yameen chuan damdawi lama inenkawl tura an ram chhuahsan a phalsak a, Nasheed hian Britain a pan nghal a, mahse kum 2018 khan Maldives-ah a kir leh.

Kum 2019 khan Nasheed parliament speaker ah thlan tlin niin an rama thiltithei ber dawttu dinhmunah a ding mek.