US-ah Class 6 zirlaiin school-ah silai pawng kah

Idaho state, US-a Idaho Falls bula Rigby Middle School-a sixth-grade zirlai hmeichhe naupang chuan Ningani khan an school-ah silai a pawng kah a,mi pathum a kap hliam.

Silai hmetpuaktu hi kum 11/12 vel nia sawi a ni a, a hming erawh puanzar a ni lo.

Jefferson County sheriff Steve Anderson chuan, hmeichhe nau­pang hian a backpack aṭangin silai hi la chhuakin, school chhung leh pawnah a pawng kah chiam niin a sawi. Zirtirtu pakhatin a hnua a silai hi a laksak thei ta niin a sawi bawk.

Hliam tuarte hi zirlai pahnih leh staff pakhat an ni a, mahse an ngaihtuahawm lutuk lo nia sawi an ni.

He thil thleng hi FBI bakah local law enforcement lam chuan an chhui zui nghal a ni.

US-ah hian inpawngkahna a thleng fo a, tun hnaiah India­napolis-a FedEx facility, Colorado-a grocery store leh Atlanta-a spa ṭhenkhatah inkah­na hi a lo thleng tawh bawk.