Myanmar sipai sorkarin satellite TV khap
Myanmar-a sipai sorkar chuan satellite kaltlangin dan loa din pawl leh news agency-ten thu dik tawk lo an thehdarh ṭhin nia sawiin, satellite television tihchhuah a khap.
State Administration Council chuan satellite dish hmangte chu kum khat lung-in tan emaw, an ram pawisa kyat 5,00,000 emaw chawitir theih an ni tih a sawi.
Satellite TV kaltlanga organisation leh news agency-te program tihchhuah ṭhin chu an ram himna tiderthawng thei niin sipai sorkar chuan a sawi. He khapna siam hian foreign news channel-te pawh a nghawng tel vek a ni.
Sipai sorkar duh lohna lantira nawrh huaihawtte chungchang report ṭhin news agency eng emaw zat chu news tihchhuah khapsak an lo ni tawh a, hei bakah hian journalist 71 man ni tawhin, an zinga 48 chu hren mek an la ni. Journalist-te hi thu dik lo thehdarhah puh an ni a, thiam loh chantir an nih chuan kum thum thleng tan tir theih an ni ang.
Mobile internet data leh wireless broadband-te chu kar ruk chuang tihtawp sak an ni tawh bawk a, February 1-a sipaiten civil sorkar thuneihna an hnehchhuh hnuah khan an ramah Facebook leh social media platform dangte pawh an block nghal bawk.