Kabul-a bomb puakah mi 58 an thi
Afghanistan khawpui, Kabul-a Inrinni liam taa hmeichhe school bula bomb puak vanga thi chu mi 58 an tling tawh a, mi 150 chuangin hliam an tuar tih Afghan official-te chuan an sawi.
Inrinni tlaia bomb puahna hi Kabul khawthlang lam, Shi`ite Muslim-te tamna hmun, Dasht-e-Barchi-a Syed Al-Shahda school bulah a ni. Bomb hi school an ban lai, tlai dar 4.30 velah tihpuah nia sawi a ni a, bomb puak vanga thi zingah hian zirlai naupang, kum 11-15 inkar eng emaw zat an tel.
Afghanistan president Ashraf Ghani chuan pawikhawihna thleng hi Taliban hel tih ni ngeia ngaiin a dem thu a sawi. Mahse Taliban thupaungtu chuan pha thungin, an pawlin inhnamhnawihna an nei lo tih a sawi a, an mi leh sate chu Aghanistan mipui laka pawikhawihtute hrem ngei turin a chah a ni.
Bomb puaka thi chhungte chuan Afghanistan sorkar leh khawthlang ram thuneitute chu an ram chhunga tharum thawhna leh tualchhung indona thleng mek titawp thei loah puhin an dem thu an sawi.
Ruang ṭhahnem tak chu ruang dahna aṭanga lak chhuah niin khawpui thlanglamah a ruala phum an ni a, hetih lai hian chhungkaw ṭhenkhat chuan an chhungte chin hriat lohin an la awm mek tih sawiin, nimin thleng khan damdawi-in lamahte an la zawng hlawm a ni.
He pawikhawihna hi U.S. leh NATO sipaite Afghanistan aṭanga lakchhuah ṭan anih aṭanga kar khat hnuah thlengin, US chuan September 11-ah a sipai awmte chu lachhuak vek turin thuthlukna anlo siam tawh a ni. Mahse Afghanistan-a ram dang sipai awmte lakchhua an nih aṭang hian thuneihna inchuhin Afghan security force leh Taliban helte inbeihna a pung chho leh nasa tawh hle.