Myanmar sipaiten unity government firfiak pawlah puang

Myanmar sipai sorkar chuan sipai rorelna duh lotuten civil sorkar aiawhtu atana an din, National Unity Government (NUG) chu firfiak pawlah a puang.

Sipaite chuan an rama tualchhung buaina thleng meka bomb tihpuah, in hal leh inthahna thlengah NUG chu mawhphurtuah a puh bawk.

State television MRTV chuan firfiak pawlah NUG puan a nih thu hi sawiin, anti-terrorism law hmangin an chungah ro rel sak theih a ni tawh dawn tih a sawi a, an thiltih avangin ram chhungah firfiaka chetna nasa tak a thlen phah a ni, a ti.

NUG hian sipaiten Parliament member aṭanga an paihthlak tak leh democracy thlawptuten an din a ni a, anni pawh hian sipaite hi firfiak pawlah an lo puang ve tawh bawk a ni. NUG chuan democracy tundin phuta nawrh huaihawtte sipaiten an beih let a, an zinga eng emaw zat an kahhlum tawh avangin sipaite laka mipuite venghimtu tur, People's Defence Force an din tur thu pawh an sawi tawh a ni.