WHO-in Sinopharm vaccine a pawm

World Health Organization (WHO) chuan Zirtawpni liam ta khan emergency-a hman atan China siam, Sinopharm Covid-19 vaccine a pawm. He thutlukna an siam hian vaccine chungchanga insumdawnna kawngah hmasawnna a thlen a, China hian ram dang hnenah tam zawk a thawn chhuah theih rin a ni.

China hian vaccine chi nga hman theih turin a pawm tawh a, Sinopharm leh Sinovac vaccine te chu ramchhungah a hmang mek a ni.

Sinopharm vaccine hi ram 45 chuan an rama puitlingte hman atan an pawm tawh a, dose maktaduai 65 siamchhuah tawh a ni. Hetih lai hian ram ṭhenkhat chuan WHO hriatpuina an la dawnloh avangin an rama hman atan him loah a ngai thung.

WHO chuan Pfizer/BioNTech, AstraZeneca-SK Bio, Serum Institute of India, Janssen vaccine te chu emergency-a hman atan a pawm tawh a, China hian ram danga hman a nih theihnan WHO hnenah nawr na viau mah se an vaccine siamah buaina ala awm avangin pawmpui an la ni velo. Mahse WHO chuan Zirtawpni-a a press release-ah Sinopharm Covid-19 vaccine te chu emergency a hman theih zinga a pawm thu a tarlang ta a, Chinese vaccine zinga a pawmpui hmasak ber a ni.

Sinopharm vaccine hi Beijing Bio-Institute of Biological Products Co Ltd siam niin, China National Biotec Group (CNBG) nen an thawkdun a ni.