East Jerusalem-ah buaina a chhuak leh

Israel-a East Jerusalem hmuna al-Aqsa mosque bulah nimin khan Israel police leh Palestinian-te inkarah buaina a chhuak leh. He hmunah hian ni thum chhung buaina a lo chhuak tawh a ni.

Buaina chhuahna al-Aqsa mosque complex hi Islam ho hmun thianghlim pakhat a ni a, he hmun hi Juda-te hmun thianghlim, Temple Mount awmna a ni bawk.

Nimin khan kum 1967 Arab-Israel war-a Israel-in East Jerusalem a lakna champha niin, kumtinin hemi ni hian Juda-te chuan Jerusalem Day Flag March hmangin kawng an zawh ṭhin. Nimin pawh khan kawng zawh an tum leh a, mahse police-te chuan boruak ṭha lo a chhuah ven­thawn thilah Juda-te chu al-Aqsa complex-a an hmun thianghlim tlawh an khapsak a ni.

Mosque bulah hian Palestinian mi eng emaw zat pungkhawmin, Israel police-te chu lungin an tawng a, police-te hian stun grenade leh rubber bullet hmangin a kap let ve nghal a ni. Palestinian Red Crescent Society chuan Palestinian mi 180 velin hliam an tuar a, an zinga mi 80 chuang chu an dinhmun a ṭha lo hle a, damdawi-inah dah an ni tih a sawi.

Israel prime minister Benjamin Netanyahu-a thupuangtu, Ofir Gendelam chuan Palestinian firfiakte hian Temple Mount-ah hian buaina chawh chhuah tumin an lo ruahman lawk vek a ni tiin, a thil ruahman chu a takin an hmu ta niin nimina thil thleng chungchang chu a sawi.

Israel sorkar chuan Jerusalem khawpui pum, East Jerusalem pawh huam vekin an ram khaw­puiah a chhiar a, mahse hei hi Palestinian lam chuan pawm loin, East Jerusalem chu Palestinian ram hran a din hunah an khawpui turah an ngai thung a ni.