China in Mount Everest-ah indaidanna siam tum

China chuan Mount Everest-a lawnte Covid-19 hri laka an himna turin indaidanna (separation line) siam a tum.

Nepal chu Covid-19 hri lengin a tihbuai zingah tel vein, Nepal lam aṭanga tlang lawn zingah summit base camp-a damlo ṭhahnem tak an awm a, hei vang hian an ram lam aṭanga tlang lawnte an himna turin daidanna siam tum a nih thu a sawi a ni. Mount Everest hi China-Nepal ramri a awm niin, hmar awih(slope) lam hi China kutah a awm a ni.

Kum 2019-a China-a coronavirus hri a len tirh khan sorkar chuan hri leng thunun turin khauh takin hma a la nghal a, lockdown khauh tak te kalpuiin an ramri pawh ṭum eng emaw zat an khar tawh a ni.

Tibet thuneitute chuan chhim leh hmar lam aṭanga Everest tlang lawnte'n tlang chhip an thlena physical contact an neih lohna turin khuahkhirhna khauh tak an siam a, tlang chhipah hian an indaidanna tur lian fel tak siam a ni dawn tih Tibet Mountaineering Association hotu chuan a sawi.

Chinese tlang lawn mi 21 te chu April thla aṭang khan Tibet-ah lo inkhunghrang tawhin Everest lawn turin phalna an nei tawh a, hri laka himna atan tlang lawn tur ni lo chu khualzin luh an remti lo. China hian hripui vangin nikum aṭang khan ramdang mi Everest tlanga lawn hi a lo khap tawh bawk.

Mahse Nepal chuan kum 2020-a hripui vangin tourism industry sum tam tak an hloh phuhruk nan thupek thar tichhuakin, an rama khualzin hipna atan climbing permit ṭhahnem tak a pe chhuak tawh a ni. Nepal lam aṭanga tlang lawn turte tan Everest permit $11,000 an chawi a ngaih bakah, expedition cost atan $40,000 thlengte an chawi leh a ngai leh thin.