Thailand-a Myanmar journalist tlanchhiate thubuai siamsak

Myanmara sipai sorkar a din hnua Thailand rama tlanchhia, journalist pathum leh activist pahnihte chu dan loa an rama lutah puhin thubuai siamsak an ni.

February 1-a sipaiten civil sorkar paihthla a, thuneihna an hnehchhuh hnu khan an ram chhunga journalist eng emaw zat chu sipai rorelna duh loa nawrh huaihawtte chungchang an report vangin man an ni a, thubuai siamsak an ni tawh bawk.

Thailand rama tlanchhia mi pangate hi Pathianni khan Chiang Mai khawpuia police-ten an man a ni. An mi mante Democratic Voice of Burma (DVB) journalist pathum leh activist pahnih an ni tih an sawi a, mahse an hming erawh puanzar an ni lo.

Dan loa Thailand rama luta puhna thubuai siamsak nghalin, he thubuaiah hian thiam loh chantir an nih chuan Myanmar ramah thawn kir leh nghal an ni ang.

Myanmar sipai sorakr hian an media organisation eng emaw zat chu an ram chhunga hna thawh a lo khap tawh a, heng zingah hian DVB pawh a tel a ni.

DVB chuan an journalist-te man an nih chungchangah Thailand thuneitute hnenah ngenna thlen nghalin, Myan­mar ramah thawn kir an nih chuan an nunna atan a hlauh­thawnawm dawn tih an sawi a, thawn kir lo turin an ngen. Bangkok-a United National High Commissioner for Refugee hnenah pawh hma lak sak turin an ngen bawk.

Nimin khan Human Rights Watch (HRW) chuan Thailand sorkar hnenah Myanmar aṭanga tlanchhia a mante hi chhuah a, an ramah thawn kir lo turin ngenna thuchhuah an siam. HRW Asia director Brad Adams chuan Myanmar rama thawn kir a nih chuan man an nih bakah, hremna na tak pek an ni ngei dawn a ni, a ti.