China mihring punna tlakhniam ber ṭum a thleng
Kum 1950 hnu lam, kum 2010 leh 2020 inkar kha China ram mipui punna a tlakhniam ber ṭum a ni. Ram mipui punna a tlakhniam zel avangin sorkar pawh fa tam zawk nei tura chah a, hamṭhatna siamsak tura nawrna a awm a ni.
Kum 1970 chho-a fa pakhat chauh neih phalna, one-child policy kalpui a nih aṭang khan China ram mipui ṭhanna chu zawi zawia tlahniamin, Thawhlehni khan 2020 census result tihchhuahah China rama mihring cheng chu tluklehdingawn 1.41 niin, census hmasa aia a punna hi 5.38% a ni.
2010 census-ah khan China ramah mipui tluklehdingawn 1.34 awmin, census hmasa aiin 5.84% in an pung a, hemi hmaa census vawi ruk an neihah chuan an punna hi double digit a ni phak vek bawk.
One-child policy avanga an ram mihring punna a tlakhniam zel avangin kum 2016 khan China chuan he policy hi titawpin, fa pahnih neih a phal tawh a ni. He policy hmang hian kum 2020-ah an ram mipui chu tluklehdingawn 1.42-ah pun chhoh hman tumin target an siam a, mahse census result tihchhuahah an target hi an pha ta lo a ni.
China media-te chuan an ram dinhmun tawn zel tur chu a ṭha dawn lo nia sawiin, kum rei loteah mihring cheng zat chu an tlahniam tawh hlea a rinawm thu an sawi. United Nations pawhin China-a mihring cheng tam hun ber tur chu kum 2030 niin, hemi hnu aṭang chuan mihring cheng zat hi an kiam zel dawn niin a lo chhut lawk bawk.
2020 census result tihchhuahah hian thil lawmawm lam pakhat a awm thung a, kum naupang zawk, kum 14 leh a hnuai lam chu chhiarpui hmasa aia pungin, an ram mipui zat aṭanga 17.95% an tling pha. 2020 census-ah khan kum 14 hnuai lam hi 16.6% chauh an awm a ni.
Nau piang zat tlahniam zel
Kum 2016 aṭanga 2019 inkar khan kum 2016 tih lohah chuan kumtin nau piang zat an tlahniam zel. Kum 2020-a nau piang zat erawh an la tarlang lo thung.
Demography expert Huang Wenzheng chuan China chuan an rama nau piang tlakhniamzia hre turin census data tihchhuah kher an mamawh lo tih a sawi. Kum 2020-ah an ram mipui zat hi tlahniam lo mah se, 2021 emaw 2022 emaw chuan a tlahniam dawn tho a ni, a ti.
Khawpuia nupa cheng, a bikin kum 1990 hnu lama piangte chuan chhungkaw din aiin an eizawnna leh zalenna an ngai pawimawh zawk a, China khawpui awm man hautak zia chhutin nau neih an hmanhmawh loh phah niin an sawi.
Kum 2005-a report tihchhuahah, chhungkaw khat hian naute enkawlna atan yuan 490,000 ($74,838) seng ral ziah anga chhut a ni. Thil man sang zel avangin kum 2020-ah yuan maktaduai 1.99 an seng tawh niin media-te chuan an tarlang.