Israel PM-in Lod-ah State of emergency a puang

Israel prime minister Benjamin Netanyahu chuan buaina nasa tak chhuak vangin Lod khuaah state of emergency a puang.

Israel police-te chuan buaina hi Lod khuaa cheng Arab mite chawh chhuah niin an puh. Hetih lai hian hmun dangah Israel leh Palestinian-te inkarah buaina a la chhuak chhunzawm zel bawk.

Lod hi Tel Aviv khaw dai, Ben Gurian airport bula awm a ni. He khuaah hian mi 77,000 vel chengin an zinga Jewish Israel 47,000 leh Arab Israel 23,000 vel an awm a ni. Buaina chhuah hnuah PM Netanyahu pawh thil awmdan en thlithlai turin he khuaah hian a kal a ni.

Police-te chuan Lod khuaa Arab Israel ṭhenkhat chuan buaina hi chawk chhuakin, motor-te an hal bakah in leh lote pawh an tichhe tel tih an sawi. Synagogue pathum leh sumdawnna hmun ṭhenkhatte an hal hnuah Israel chuan border police platoon 16 a tir lut a ni. Lod bakah Israel Arab chenna hmun dang Acre, Wadi Ara leh Jisr A-Zarqa ah buaina hi a chhuak bawk.

Kar liam ta Zirtawpnia East Jerusalem-a al-Aqsq mosque-a Palestinian pungkhawmte leh Israel riot police-te inkar buaina chhuak vangin hmun hrang hrangah buaina hi a chhuak chhunzawm zel a ni. Muslim leh Juda-te hmun thianghlim, al-Aqsa compound leh khawpui chhung hmun danga buaina chhuakah Palestinian mi 700 velin hliam an tuar nia sawi a ni.

Gaza air strike-ah mi 35 an thi
Israel sipai leh Palestinian firfiak pawl, Hamas-te pawh an la inbei chhunzawm zel.

Nimin zing khan Israel sipaiten thlawh­theihna hmanga Gaza Strip-a beihpui an thlaknaah mi 35 an thi nia sawi a ni. Hetih lai hian Hamas leh Palestinian pawl dangten rocket hmanga Tel Aviv leh Beersheba an kahnaah Israel mi panga an thi nia sawi a ni bawk.

Israel sipaite chuan Gaza an beihnaah hian Hamas intelligence hruaitu eng emaw zat an that niin an sawi a, hei bakah hian rocket an kahchhuahna hmun, Hamas offfice leh an pawl hruaitu ṭhenkhat in pawh an kap fuh tih an sawi.

Tun ṭuma an inbeih hi kum 2014 hnua Gaza-a Israel leh Hamas pawl inbeihna nasa ber a ni a, ram hrang hrang pawhin an inbeihna titawp turin an ngen tawh hlawm a ni.

Middle East-a UN peace envoy Tor Weenes­land chuan inbeihna chu titawp nghal tura ngenin, boruak ṭha siam turin Israel leh Hamas hruaitute chuan an mawhphurhna an lak a ngai tih a sawi. "Gaza-a indona hi a tuartu ber chu mipui nawlpui an ni. UN chuan boruak ṭha a awm theihna atan theihtawp a chhuah mek a, inbeihna leh pawikhawihna thlengte hi tihtawp a hun tawh a ni," a ti.