US-a face mask siamtuten Biden ṭanpuina ngen

United States-a face mask siamchhuaktute chuan ram chhungah China siam face mask man tlawm tak taka zawrh chhuah a tam avangin, an mask siam maktaduai enge maw zat hralh theih lohin a awm phah tih an sawi a, hei vang hian US president Joe Biden ṭanpuina an ngen.

US manufacturer-te chuan China mask siam vangin an tlakchhiat phah an hlau hle tih an sawi.

President Joe Biden hnenan ṭanpui tura ngentute hi manu­facturer tenau 26 awmna trade group an ni a, hengte hi nikuma an rama hri leng nasat laia hri laka invenna tur mamawhte siam tura dinte an ni hlawm a ni.

Manufacturer-te chuan China aṭanga mask man tlawm taka lak luhte thuneitu lamin an tihtawp loh chuan an mask siamchhuah zahve aia tam chu sorkar puihna an dawn loh chuan ni 60 hnuah thehthang mai a ngai dawn niin an sawi a, hei vang hian mi tam tak in hna an chan phah tur thu an sawi bawk.

"Dik lo taka rampawn aṭanga lakluh tihtawp a nih theih nan ngenna kan rawn siam a, hma lak vat a nih loh chuan US-a PPE mask manufacturing industry te chu an ṭhang thei dawn lo a, US in hripui kan dona kawnga kan hmalakna te a tichhe thei a ni," tiin American Mask Manufacturer's Association chuan an tarlang.

Trade group chuan kumtin surgical mask tluklehdingawn 3.7 leh N95 mask ṭha chi tlukleh­dingawn khat chuang an siam chhuah theih tur thu sawiin, tunah hian surgical mask maktaduai 260 leh N-95 mask maktaduai 20 chuang chu an hralh theih loh vangin warehouse leh factory shelve-ahte dah a nih thu an sawi.

Nikuma mask supply indaihloh vanglai khan mask man a sang hle a, mahse tunah erawh a man a tlahniam tawh hle thung. Nikuma surgical mask 50 awmna box $50 vela an lei ṭhin chu tunah chuan $5 in lei tur a awm tawh a ni.

Trade group chuan surgical mask siam nan cent thum aṭanga cent ruk vel an sengral ṭhina sawiin, tuna China hnen aṭanga an lakluh chu cent khat in leitur a awm a ni, an ti.

Nikum khan manufacturer-te chuan US-ah hna 7,800 an siam belh a, mahse production tihtlema ngaih tak avangin hmun thuma ṭhena hmun khat vel chuan an hna hi an chan tawh a ni. "Kan dinhmun ngai renga kan din chuan, kan thil siam chhuah 54% chu ni 60 chhunga tihtawp a ngai ang a, kum khatah phei chuan 84.6% in a tlahniam thei dawn" niin an tarlang.