Nauru rama puitlingte'n vaccine an la kim

Khawvela thliarkar ram te ber, Nauru-a puitling cheng zawng zawng te chuan Covid-19 vaccine dose khatna an la kim vek tawh a, "world record" an siam.

Ram kilkhawr taka awm Nauru hian kar li chhunga vaccine pekchhuah runpui an neih chu an tum aia chaka a kal avangin an lawmzia an auchhuahpui nasa hle.

Vaccine dose khatna hi mi 7,392 hnenah pek a ni tawh a, an rama khualzinte pawh pek tel nghal an nih thu an sawi.

National Coronavirus Taskforce chuan world record siam theia an awm chu an lawm thu sawiin, record siam thei leh Covid laka fihlim ram leh him siam thei tura an hmalakna an thlawp ṭhat avangin ram mipuite chungah pawh an lawm thu an sawi bawk.

Taskforce chairman Kieram Keke chuan Nauru sorkarin an rama puitling zawng zawnga daih tur vaccine an nei chu thil vanneihthlak tak a ni tih sawiin, hei vang hian an inthlahdah phah tur a ni lo tih a sawi nghal bawk. An ram chu hri kai awm lohna thliarkar a nih zui zel theih nan test kalpui ṭhat zel chu an tihmakmawh a ni, a ti. Keke chuan an rama khualzin lutte chu coronavirus an kai theih avangin PNG, Fiji leh India te anga dinhmun awhawmlo taka inthlak thleng thei an nih avangin fimkhur a ngaih thu a sawi.

Nauru hian Covax programme hnuaia ram rethei zawkte hnena vaccine pek hna kalpuina hnuaiah AstraZaneca vaccine an dawng a ni.