Myanmar sipaite'n bomb tipuaktua puh mi 39 man

Myanmar sipaite chuan bomb tipuaktu leh sorkar building halnaa mawhphurtua puh mi 39 an man tih sipai sorkar hnuaia media agency chuan a tarlang.

February 1-a sipaiten civil sorkar thuneihna an hnehchhuh hnuah Myanmar ram khawpui ṭhenkhatah bomb-te puakin, sorkar office leh sipai hmunhmate pawh beih an ni fo. Eng pawl mahin heng thil hi an tih a nih thu an sawi ngai lo a, mahse sipaite chuan sipai sorkar dodaltuten an ram tihchhiat tuma an beihnaah an puh a ni.

Global New Light of Myanmar chan­chinbu chuan security force-ten hmun hrang hrang an dapnaah handmade mine 48, TNT stick 20, detonator, fuse, gun powder leh hmanraw dangte an man tawh niin a tarlang. Hei bakah hian an ram khawchhak lam, Kayah state-ah helpawl bula training tuma ni rinhlelh mi eng emaw zat an man bawk.

Sipai rorelna duh loa nawrh huaihawtte beih let a, an zinga tam tak man an nih hnuah ṭhalai eng emaw zat, democracy thlawptu zinga mite chu helpawl bulah military training an nei mek nia sawi a ni bawk.

Thawhlehni kha sipaite'n mipui sorkar thuneihna an hnehchhuh aṭanga a ni 100-na a ni a, ram chhung khawpui hrang hrangah sipai rorelna duh loin nawrh huaihawt chhunzawm a ni.

UN human rights office (OHCHR) chuan ram hrang hrangten nawrh hauihawtte laka tharum thawhna an thlen ṭhinte titawp turin Myanmar sipaite chu ngen reng mah se, sipaite hi mipuite chungah rawng takin an la che chhunzawm reng a ni, a ti. OHCHR thupuangtu Rupert Colville chuan sipaite hi thuneihna an chelh chhunzawm theihna atan eptute chunga rawng taka an chet hi tawpsan mai tumna an la nei lo, tiin a sawi. Thawhlehni thleng khan nawrh huaihawt zinga sipai kut tuara thi hi mi 882 an tling tawh.