Nepal PM-in House-ah fiahna paltlang zo lo

Nepal prime minister KP Sharma Oli chuan Thawhṭanni khan Parliament-a fiahna a paltlang zo lo.

CPN (Maoist Centre) hruaitu PK Dahal Prachanda-a'n PM Oli kaihhruai sorkar an thlawpna a hnuhdawh avangin Parliament special session koin trust vote lak a ni ta a ni. Member 275 awmna lower house-ah PM Oli hian thlawptu 93 chauh a nei a, a thlawp lo lamah vote 124 a tla thung. Vote laknaah hian Oli party, Communist Party of Nepal (UML) MP zinga 28 chu an hai a, an zingah hian prime minister hlui pahnih Jhalanath Khanal leh Madhav Kumar Nepal te pawh an tel.

Prime Minister-in sorkar siam zel tura ring tawktu a ngah zawh tak loh avangin president Bidya Devi Bhandari chuan political party hrang hrangte chu ni thum chhunga sorkar thar siam dan tur ngaihtuah turin a ti.

Nepali Congress leader Prakash Man Singh chuan Oli hian fiahna a paltlang loh avangi PM post aṭangin paih a ni nghal tih sawiin, ṭangrual sorkar thar a ding thuai dawn tih a sawi. Hetih lai hian Communist Party of Nepal (UML) hi party mala seat ngah ber an la nih avangin, President hian Oli hian party dang thawhpuia sorkar thar siam dan tur ngaihtuah turin a la ko thei reng tho a ni.