Facebook hnenah naupang pual Instagram siam lo turin ngen
US-a state attorney general 40 rual chuan Thawhṭanni khan Facebook chief executive Mark Zuckerberg hnenah naupang kum 13 hnuai lamte tana hman tur, Instagram kids version siam tum chu chawlhsan turin an ngen.
"Naupangin social media an hman nasat hian an hriselna leh an hmakhua an tichhe thei a, social media account nei turin an rilru a la puitling tawk lo, a hma pawhin Facebook hian naupang hmakhua venhimna kawngah a thawk ṭha tawk lo" tiin official-te chuan Facebook hotu hnena lehkha an thawnah hian a tarlang.
Lehkha thawnah hian New York, Texas, California, Massachusetts, Nebraska, Michigan, Ohio, Utah, Vermont, Kentucky attorney general-te chuan hming ziakin, Facebook chuan mipui mamawh chhanna tur lam ngaihven aiin, buaina siam belh an tum a ni, tiin an sawisel.
Massachussetts attorney general Maura Healey chuan naupang tana Instagram siam chu thil zahthlak tak, pawisawilote dinhmun tihchhiat a, hlawkna lo tel tumna a ni tiin a sawi bawk.
Hetih lai hian Facebook thupuangtu chuan an company-in Instagram kids version siamna tur hian zirchianna thui tak an kalpui tih a sawi a, naupang kum 13 hnuai lam hman turah chuan fakna lo awm ṭhin zawng zawngte chu tihbo vek an tum a, naupang himna leh mimal thil vawnhim nan child development expert te leh rilru lam zirmi te uluk taka an rawn tur thu a sawi.
State attorney-te chuan an lehkhathawnah hian media report 2019-a a landanin Facebook-in kum 6 aṭanga kum 12 tana Messenger Kids app an siam pawh naupang khawih atan a him tawk lo hle a, hmelhriat loh nena an inbiakpawh mai theih avangin an nu leh pa te pawhin an pawmpui loh thu an au chhuahpui tawh a ni, an ti.
Thla hmasa khan Commercial-Free Childhood campaign chuan Zuckerberg hnenah kids version in an nun a nghawng buai theih avangin siam lo turin an lo ngen tawh bawk a ni.