Israel leh Hamas Inbei chhunzawm zel

Israel leh Palestinian pawl, Gaza Strip-a rorellai Hamas-te chu an inbeih chhunzawm zel a, inbeihna avanga thi pawh an pung zel. Gaza-ah mi 83 thi tawhin, Israel-ah mi pasarih an thi tawh a ni.

Gaza health ministry chuan Israel-in beihpui a thlakna avanga thi mi 83 zingah hian naupang 17 an tel niin a sawi a, hliam tuar mi 480 chuang an awm tih a sawi bawk.

Thawhṭanni aṭang khan Israel leh Hamas-te hi inkapin, Gaza aṭanga rocket hmanga Israel ram beih chu Israel sipaiten airstrike hmangin na takin an chhang let nghal a ni. Nimin thleng khan an inkap chhunzawm a ni.

Hemi hma hian hun eng emaw chen chu East Jerusalem-a Muslim leh Juda-te hmun thianghlim, al-Aqsa mosque compound-ah Israel leh Palestinian-te inkarah buaina chhuakin, khawpui hmun dangah pawh buaina hi a kangkai zel a ni. Khawpui hrang hranga buaina chhuakah hian mi 374 chuang man ni tawhin, buaina chhuakah police officer 36 in hliam an tuar tawh bawk.

Israel prime minister Benjamin Netanyahu chuan buaina chhuahna khawpuiahte dan leh thupek kenkawhna kawnga police-te pui turin sipai dah luh a tum tih a sawi. Netanyahu chuan pawn lam aṭang leh ram chhung aṭanga hmelmaten Israel mite an beihna laka venghim turin sorkar chuan a theihna zawng zawng a hmang dawn tih a sawi a ni.

Khawpui hrang hranga Israel-Palestinian inkara buaina a chhuah hnuah, Thawhṭanni zan khan Gaza Strip aṭang hian Israel chu rocket eng emaw zatin kah a ni a, nimin zing thleng khan Gaza aṭang hian rocket 1,500 vel an kap chhuak tawh niin Israel Defence Forces (IDF) chuan a sawi. Israel sipaiten Hamas-te chhan letna atana airstrike an neihah hian Gaza-a Hamas ho hmun pawimawh eng emaw zat an tihchhiat sak tawh. Gaza City-a in chhawng sang pathumna, al-Sharouk tower chu kah chhiat a ni. He buildingah hian Hamas enkawl, al-Aqsa TV sation pawh a awm. Hamas senior official ṭhenkhat pawh an kaphlum niin Israel chuan a sawi a, Hamas lam pawhin an pawl senior commander leh hruaitu dangte an thih thu an tichiang tawh bawk.

Ram hrang hrangte'n ngenna siam
Tun ṭuma Israel-in Gaza Strip a beih hi kum 2014 hnu lama beihpui a thlak nasat ber ṭum nia sawi a ni. Ram leh pawl hrang hrangte chuan Israel leh Hamas-te chu inbengdai a, an inbeihna titawp turin an ngen.

UN secretary general Antonio Guterres chuan inbeihna thleng mek chu ngaihven a ngai hle a ni tih sawiin, hemi chungchang sawiho tur hian UN Security Council pawh vawiinah an inhmukhawm dawn tih a sawi. He meeting-ah hian Israel leh Palestinian aiawh pawh an tel dawn nia sawi a ni.

UNSC hian Thawhṭanni aṭang khan Israel ram ṭhianṭha, US chu closed-door video conference ṭum hnih a lo neihpui tawh a, mahse US hian joint declaration siam a duh lo. Israel chuan an buainaah hian Security Council chu inrawlh lo turin a duh a, hei hi US pawhin a thlawp nia sawi a ni.

US president Joe Biden chuan Nilaini khan Israel PM Netanyahu chu telephone-in a bia, Israel ram himna a duhpui thu a sawi rualin, inbengdai a, boruak ṭha siam a ṭul thu a sawipui. Israel chu rocket tam tak hmanga kah a nih laiin a ram himna atana hma la turin dikna a nei a ni, tiin Biden chuan a sawi. US secretary of state Antony Blinken chuan Israel leh Hamas aiawhte be turin palai a tir thuai dawn tih a sawi bawk.

Russia pawhin inbeihna thleng mek chungchang sawiho turin Middle East Quartet ( US, EU, UN leh Russia) meeting neih thuai a rawt.