Myanmar sipaiten Chin state-ah martial law puang

Myanmar sipai sorkar chuan an rama Chin state-ah helpawlten police station leh bank te an beih vang leh, ramria sipai leh helho inbeihna a thlen reng avangin he state-ah hian nimin khan sipai hnena thuneihna sang pekna, martial law a puang.

Sipai rorelna duh loa epna a darh zau zel a, sipaite chuan khawpui hrang hrangah nawrh huaihawtte leh, ramri state-a helpawl nena inbeihna thleng fo thunun tumin hma la mah se a thunun hlei thei lo a ni.

Nilaini leh Ningani khan Chin state-a Mindat khuaah tualchhung mi 100 velin tualchher silai nen police station an bei a, mi dang 50 velin Myanmar Economic Bank an bei bawk. Myanmar News Agency chuan pawikhawihtute hi security force-ten an lo bei let a, thi leh hliam erawh an awm lo tih a tarlang.

Mindat khuaa thil thlen dan kimchang hi hriat theih a ni lo a, mahse buaina lo punlun leh chhan chu sipai hoin mi tang pasarih an mante chhuah tura an tiam tawh an tihhlawhtlin leh tak loh vangah an ngai a ni. Sipai rorelna dodaltu lam chuan martial law puan pawh chu an pawm lo tih an sawi bawk.

Tun hnaia pawl ding thar, Chinland Defence Force thupuangtu chuan, "Sipaite hian an hmunpui neihna, khawpui lamah tih loh chuan rorelna an lekkawh thei tawh lo. Thingtlangah phei chuan thuneihna an nei tawh lo," tiin a sawi a, an inbeihnaah an pawl mi pakhat a thih thu leh, sipaite nen an la inbeih chhunzawm zel thu a sawi a ni.

Nimin khan Yangon khaw­puiah sipai rorelna duh lotu­ten kawng an zawh leh a, inbeihnaah hnehna an chan ngei tur thute an aupui a ni.

Civil sorkar aiawhtu atana din, National Unity Govern­ment chuan sipaite laka democracy thlawptute venghim turin People's Defence Force a lo din tawh a, he force hi an rama helpawl hrang hrangten an thlawp tih an sawi.