Gaza Strip-ah Mi 100 chuang thi tawh

Israel sipaite chuan nimin khan a ni ngana atan boruak leh khawmual aṭangin Gaza Strip a beih chhunzawm leh a, Israel beihpui thlakna avang hian Gaza-ah mi 100 chuang an thi tawh nia sawi a ni. Palestinian lam pawhin rocket hmangin Israel hi an kah chhunzawm ve reng bawk.

Israel sipaite chuan boruak leh khawmual aṭangin sipaiten beihpui an thlak tih an sawi lang a, hemi rual hian Gaza Strip-ah erawh an lut lo tih an sawi. Boruak aṭanga beihpui thlakna atan hian Israel sipaite hian aircraft 260 an hmang a ni. Ningani khan Gaza ramri-ah sipai 7,000 leh tank-te dah belh an ni tawh.

Gaza Strip-a Hamas ho hman ṭhin, underground tunnel an kap chhia niin Israel sipaite chuan nimin khan an sawi. Hamas-ten Israel ram luh ruk leh beihna atana an hman ṭhin, underground tunnel chu an bitum zingah telin, target 150 chuang an kap fuh tawh tih an sawi. Gaza an beihnaa thi zinga eng emaw zat chu Palestianian hel an ni tih an sawi bawk a ni.

Ram leh pawl hrang hrangten inbeihna titawp turin ngen mah se, Israel prime minister Benjamin Netanyahu chuan beihpui thlak hi chhunzawm zel a ni dawn tih a sawi a, "Hei hi Israel ram boruak ṭha siamna turin a la ṭul a ni," a ti.

Naktukah UNSC ṭhukhawm dawn
Israel leh Gaza Strip chungchang ngaih­tuahin naktuk hian United Nations Security Council meeting neih a ni dawn.

Member 15 awmna UNSC hi Israel-Gaza Strip inbeihna thleng avang hian a rukin ṭum hnih an lo inhmukhawm tawh a, mahse public statement siam turin an la inlungrual thei lo a ni. Thuchhuah siam tur hian member tinten an pawm tlan vek a ngai a, mahse US chuan hetiang thuchhuah lo siam hi buaina chinfelna kawngah a ṭangkai dawn lo nia sawiin a pawm ve lo a ni.