Israel-in Gaza Strip-ah bomb thlak chhunzawm; Hamas pawl hotu chenna in an bomb chhia
Israel sipaite chuan nimin khan Gaza Strip-a beihpui an thlaknaah Palestinian pawl, Hamas hruaitu chenna in an bomb chhia tih an sawi.
Gaza Strip-a Israel sipaite beihpui thlak hnuhnung berah hian mi 26 an thi niin Palestinian official-te chuan an sawi. Gaza aṭangin Palestinian helpawlte chuan rocket hmangin Israel an kap chhunzawm bawk a, himna zawngin Israel mi eng emaw zat chu an tlanchhia a ni.
Israel sipaite che na zel
Inrinni zan aṭanga nimin zing thleng khan Israel sipaite chuan Gaza Strip hi an bei chhunzawm leh a, Hamas hotu Yahya Sinwar leh a unaupa, Muhammad Sinwawr chenna in chu an bomb chhiat zingah a tel tih an sawi.
Heng in pahnih an tihchhiatte hi Hamas pawlin ralthuam an dahna atan an hmante a ni tih an sawi bawk. Tualchhung mite pawhin Hamas hruaitu Yahya Sinwar chenna in bomb a nih thu hi an sawi a, mahse an unau chanchin erawh hriat chian a ni lo.
Inrinni zan aṭanga Israel sipaite'n central Gaza City-a beihpui an thlaknaah hian mi 26 thiin, mi 50 velin hliam an tuar a, thi zingah hian naupang pariat leh hmeichhia 10 an tel nia sawi a ni. In chim hnuaiah tang eng emaw zat an la awm nia sawi a ni bawk. Hemi zan vek hian Palestinian helpawlte chuan Gaza aṭangin Israel chhim lam leh ram laili lam chu rocket 120 hmangin an kap bawk a, mahse thil tihchhiat lian tham leh hliam tuar an awm lo niin Israel sipaite chuan an sawi.
Inrinni chhun khan Israel sipaite chuan warning an pek hnuah, Gaza city-a international media house, US Associated Press leh Al Jazeera te awmna, in chawng 12-a sang chu an kap chim bawk. Israel sipaite chuan he building-ah hian Hamas military office a awm tih sawiin, an beih dawn hian civil mite warning pein, building hi chhuahsan vek turin an hrilh lawk a ni.
Inbeihna kan chhunzawm zel ang : Israel PM
Ram hrang hrangte'n inbeihna titawp turin ngen mah se, Israel prime minister Benjamin Netanyahu chuan rocket hmanga an ram beihna chu na takin an chhang let zel dawn tih a sawi. Buaina chhuah chhan chu Palestinian helpawl vang tih sawiin, inbeihna chu a ṭul chen chen kalpui chhunzawm a ni dawn a, hemi rual hian civil mite tawrhna thlen tlem thei tur bera hma an lak thu a sawi.
"He buaina chhuaka a mawhphurtu chu keini ni loin, min bei hmasatute an ni zawk. Kan beihpui thlakna hi a la tawp a, a ṭul dan azirin kan chhunzawm zel ang," tiin Hamas-ten civil mi birute pawh an umzui zel laiin, anni erawh chuan civil mite tawrhna thlen lo thei ang bera an chet thu a sawi.
Biden leh Netanyahu inbia
Inrinni liam ta khan US president Joe Biden chuan Israel prime minister Benjamin Netanyahu chu telephone-a biain, Israel rocket hmanga beihna laka a ram venhimna tura a hmalakna chu US chuan a thlawp a ni tih a hrilh.
Joe Biden chuan Hamas leh Gaza-a firfiak pawl dangten Israel rama khaw hrang hranga rocket hmanga an kap chu a dem thu a sawi.
Hruaitu pahnihte hian Jerusalem-a buaina chhuak chungchangte sawiin, he hmun hi sakhaw tin betute tana hmun ralmuang a nih theihna atana siam zel an duh thute an sawidun bawk. President Biden chuan Palestnian mipuiten an zalenna leh dikna chanvo neihte an hman theihna atana hma lak a ṭul thu leh, two-state solution a thlawp thute pawh a sawi tih White House chuan a tarlang.
Ram hrang hrangah Israel demna kawngzawh nei
Israel-in Gaza Strip an beih chungchangah ram eng emaw zat, a bikin Arab ramahte Israel chetdan demna kawngzawh neih a ni. London, Paris leh Madrid-ah pawh kawngzawh hi huaihawt a ni bawk.
Khawpui hrang hrangah kawngzawhte hian Palestinian flag-te vaiin, Palestinian mite an thlawpna thute an aupui. Israel chet dan chu indona ni loin, mihring suatna a ni, an ti.
Inbeihna lo thlen chhoh dan
Israel leh Hamas-te hi ṭum eng emaw zat lo inkap tawh mah se, tun ṭum hi kum 2014 hnua Gaza Strip-a an inbeihna nasat ber a ni. He inbeihna lo irh chhuah dan -
April 13 :
East Jeruslem-ah Palestian leh Israel police-te inkarah buaina a chhuak.
Palestinian-te chu Islam thla thianghlim, Ramadan puala al-Aqsa Mosque-a ṭawngṭai tura an kalkhawm tur danna atana East Jerusalem luhna tur, Damascus Gate kawtah Israel police-ten daidanna an lo siam avangin an lungawi lo a, kaltlang luih tumin he hmuna venhim hna thawka duty, Israel police-te nen an innawr buai zui a ni.
Hemi ni vek hian Palestinian Authority president Mahmoud Abbas-an inthlan neih tur sawnhlat a nih thu a puang. Palestinian, a bikin Hamas lam thlawptute chu inthlan sawn hlat a nih avangin an lungawi lo hle a, Israel chu inrawlh leh, inthlan sawn chhanah a mawphurtuah an puh.
Damascus Gate leh East Jerusalem-ah zan lamah buaina hi a chhuak zui ta zel a ni.
April 15-16 :
Gaza Strip aṭangin Israel lamah rocket kahchhuah a ni a, hei hi Israel chuan a chhang zui ve nghal.
April 19 :
Tel Aviv khawpui bula Arab-Jewish port city, Jaffa-ah buaina a chhuak ve leh.
April 20 :
Orthodox Jews an tihnawmnah lai chu Palestinian lamin TikTok video sharing-app ah an post avangin Juda ṭhalai ṭhenkhat an thinrim a, Jerusalem-ah Arab ho beiin Arab an duh lohna thute an aupui.
April 23 :
Damascus Gate-ah Juda hoin kawng zawhin, Arab mi an duh lohna thu an aupui. He kawngzawhnaah hian Palestinian ho nen intibuaiin, police-te pawh ṭhen tumin an inrawlh bawk a, mi eng emaw zatin hliam an tuar.
Khawpui chhung hmun dangah Arab leh Juda mite inkarah buaina a chhuah chhunzawm.
April 24 :
Palestinian helhoin Gaza aṭangin rocket hmangin Israel an kap leh a, Israel sipaiten air strike hmangin an chhang
let nghal.
May 2 :
Palestinian pawl pahnih, president Mahmoud Abbas-a pawl, Fatah leh Gaza Strip-a rorel lai, Hamas-te chuan court hearing neih hmaa East Jerusalem-a Sheikh Jarrah district-a Palestinian mi chengte an in aṭanga hnawhchhuah an ni chu an dem thu an sawi. Hamas chuan Arab-te chu inlungrual a, he hmunah hian Israel chet dan dodal turin a ngen.
He thil thleng avang hian police leh Palestinian-te inkarah buaina a chhuak zui bawk.
May 4 :
Gaza aṭangin Palestian helhoin Israel lamah balloon alh an chhuah a, Israel ram chhung hmun eng emaw zatah kangmei a chhuak zui.
May 7 :
West Bank hmarlamah Israel security force-te kaptu, Palestinian mi pahnih kahhlum niin pakhat kah hliam a ni. Israel thuneitute chuan heng mite hian Israel-ah pawikhawihna lian tham tak thlen an tum tih an sawi.
Ramadan tawpna puala an lama ṭawngṭaina hun an neih zawhah, al-Aqsa mosque-ah Palestinian leh Israel police-te inkarah buaina nasa tak a chhuak leh a, mi 200 chuangin hliam an tuar. Police-te chu lung leh bur hmangin pungkhawmte hian an bei a, police-te hian mipui hnawhdarh nan rubber bullet leh stun grenade te an kap zui bawk.
May 8 :
Al-Aqsa mosque-ah Ramadan puala zan pawimawh, Laylat al-Qadr puala ṭawngṭaina hun hmangtute leh Israel police-te inkarah buaina a chhuah chhunzawm a ni.
Damascus Gate-ah buaina hi chhuakin, police-te chuan water cannon, rubber bullet leh tear gas an hmang a, Palestinian mi pungkhawmte hian lungin an tawng ve bawk. He buaina chhuakah hian Palestinian mi 120 leh Israel police 17-in hliam an tuar.
May 9 :
Tualchhung buaina thleng avangin Israel Supreme Court chuan Sheikh Jarra district-a Palestinian mite an in aṭanga chhuak tura tihna thubuai ngaihtuah hun a sawn. Hetichung hian Sheikh Jarra leh Damascus Gate-ah Israel police leh Palestinian-te inkarah buaina a chhuah chhunzawm zel.
May 10 :
Zing kar aṭangin al-Aqsa mosque compound-ah Israel police leh Palestinian-te an intibuai.
Palestinian-te hian Juda miten Israel-in kum 1967-a East Jerusalem a lak champha, Jerusalem Day puala kawng zawh an tum avangin an lungawi lo zual. Juda-te hian Palestinian miten an ram chin nia an chhal, East Jerusalem-ah kawngzawh an tum a, mahse dodalna a tam avangin an kalna kawng hi thlak tir an ni. Mahse buaina chhuak zuiin, Palestinian mi 300 chuang leh Israel police 21 in hliam an tuar.
Hamas-te chuan Israel hnenah al-Aqsa mosque leh Sheikh Jarrah aṭangin zan dar 6 hma ngeia a sipai lachhuak turin a hriattir. An hun tiam chhungin Israel-in hma a lak loh avangin rocket hmangin Jerusalem an kap.
Israel prime minister Benjamin Netanyahu chuan Hamas-te chuan an huang an pel ta tiin, an sipaiten thlawhtheihna hmangin an Hamas-te an bei zui nghal a, Hamas fighter pathum an thi. Hemi ni aṭang hian Israel chuan Gaza Strip-ah hian beihpui a thlak chhunzawm ta zel a ni.