Nikum aiin hri a hlauhawm dawn : WHO Chief
World Health Organisation (WHO) chuan Zirtawpni khan ram hrang hrang hnenah an vaccine kawllaite naupang hnena pe loin, COVAX-ah pe zawk turin a ngen. Nikum ai khan kuminah Covid-19 hi a thawk nain, a hlauhawm zawk dawn niin a sawi bawk.
WHO director-general Tedros Adhanom Ghebreyesus chuan Covid-19 vaccine sem dan a rualkhai lo a, coronavirus laka invenna la dawnglo mi ṭhahnem tak an awm tih sawiin, hei hi ennawn a ṭul a ni, a ti.
Ghebreyesus chuan,"Ram ṭhenkhatin naupang leh tleirawlte tana vaccine pek an duh tih chu ka hriatthiampui hle, mahse tunah rih chuan inngaihtuah ṭha lehin COVAX hnenah lo pe turin ka sawm a ni. Ram rethei leh harsa zawkte an rama healthcare worker tan vaccine khamkhawp pe thei loin an awm a, damdawi-in te chu dinhmun ṭhal o tak taka ding te tan chauh zuah a ni", tiin a sawi.
WHO chief chuan tun dinhmunah ram rethei tan vaccine supply 0.3% bak pek chhuah a la ni lo tih a sawi bawk.
Covid-19 hian nunna maktaduai 3.3 chuang a la tawh a, hrileng thawh hnihna chu a vawi khatna aiin a hlauhawm zawk dawn tih a sawi. Vaccine rualkhai taka semchhuah chu he hri laka kan talchhuah theihdan awmchhun a ni tiin WHO hotu chuan a sawi.
WHO chuan hrileng thawh hnihna tuar mek India ṭanpuinan oxygen concentrator sang tel bakah, mobile field tent, mask leh damdawi mamawh dangte an thawn tih a puang. India mai ni loin Nepal, Sri Lanka, Vietnam, Cambodia, Thailand leh Egypt ramah pawh hian hri leng in zuallam panin, damdawi-in indaihlohna a thleng mek.
Africa leh America ram ṭhenkhatah chuan Covid-19 kai an la tam hle a, kar liamtaa Covid-19 vanga thi zinga 40% chu America rama mi an nih thu WHO Director General chuan a sawi a ni.