US-ah mask vuahna thupek hlip
United States-a state ṭhenkhat chuan Centers for Disease Control and Prevention(CDC)-in kaihhruaina a tihchhuah thar hnuah, an state tana mask vuahna thupek an siam tawh chu tidanglamin, vaccine la tawh ten pawna an chhuahin mask an vuah a ngai tawh lo a, awmna hmun azirin inchhungah pawh an vuah kher a ngai tawh lo tih an sawi.
Guidelines tihchhuah tharah hian CDC director Dr. Rochelle Walensky chuan kum khat chuang hri leng vanga nunphung buai siamṭha leh turin ruahmanna thar an siam tih a sawi. "Vaccine la kim tawh tan mipui punkhawmna chi, indoor leh outdoor intihhlimnaah mask vuah a ngai tawh lo a, taksa inhnaih takin an awm thei tawh ang. Vaccine in lak kim tawh chuan hri leng vanga in tih theih loh kha in ṭan leh thei tawh dawn," tiin Walensky chuan a sawi.
Michigan, Nevada, Oregon, Ohio, Virginia, Delaware, Maryland, Pennsylvania, Minnesota, Kentucky, Washington, Maine, Vermont, Connecticut, North Carolina, Kansas, Colorado leh Rhode Island te chuan CDC guidelines zulzuiin mask chungchanga kaihhruaina thar hi an hmang dawn tih an puang tawh.
Kentucky govenror Andy Beshear chuan, "CDC chuan vaccine kan lak tawh chuan mask vuah loh a him tawh tiin a sawi a, vaccine la vek ang u, " tiin mipuite a sawm nghal a ni.
Hetihlaiin, Michigan leh Hawaii te chu he thu chhuak pawmpui ve lo zingah telin, mipui inthlahdul a la rem loh thu an sawi. Golden State Governor,Phil Murphy chuan CDC guidelines chu zawm mai an la tumloh thu a sawi. Hawaii Gov. David Ige pawhin vaccine la leh la lo hriat hran theihloh avangin, mitin tana mask vuah chu himna tur a ni, a ti.
US hian coronavirus kai hmuhchhuah tawh mi maktaduia 32.8 leh thihpui 585,000 an awm tih Johns Hopkins University data chuan a tarlang. Khawvel pumah hrikai maktaduai 161.3 awmin hri vanga thi maktaduai 3.3 an awm. CDC tarlan danin US bikah vaccine semchhuah tawh maktaduai 341 awmin, mi maktaduai 268 in an dawng tawh.
US-a vaccine dose la kim tawh hi maktaduai 120 chuang ni tawhin, an ram mipui 36% an tling pha a ni.