Israel-in Gaza Strip-a beihnaah mi 42 thih belh

Palestinian official-te chuan Israel-in Gaza Strip-a beihpui a thlak mekah Pathianni kha ni khata thi an tam ber ṭum nia sawiin, mi 42 an thi tih an sawi.

Israel sipaite chuan kar liam ta chhung Gaza aṭangin Palestinian helhoin Israel chu rocket 3,000 chuangin an kap tih an sawi ve bawk. Pathianni zana Hamas-ten Israel chhim lam rocket-a an kah leh hnuin, nimin zing khan Israel sipaite chuan Gaza City hmun hrang hrangah air strike ṭum 80 an nei leh nghal a ni.

Gaza Strip-a Israel sipaite beihpui thlaknaah hian mi 197 an thi tawh a, an zingah hian naupang 58 an tel. Mi 1,230 in hliam an tuar tawh bawk niin Hamas sorkara health ministry chuan a tarlang. Hetih lai hian Israel chuan thi zingah hian hel tam tak an tel tih an sawi thung a, beihpui an thlakna an bitum chu hel hruaitute leh helpawl hmunhma te a ni tih an sawi.

United Nations secretary-genenal Antonio Guterres chuan inbeihna titawp tura ngenin, an titawp lo a nih chuan thunun ngaihna awm lo buaina rapthlak tak a thleng thei dawn a ni, a ti. Inbeihna thleng mek avangin Gaza-ah fuel indaih lohna a thleng tawh a, hetiang zel a nih chuan hospital leh hmun pawimawhte chu power hman tur nei loin an awm thuai dawn tih UN chuan a sawi a ni.

UN deputy special co-ordinator for Middle East Peace Process, Lynn Hastings chuan Israel thuneitute hnenah Gaza-a fuel leh an mamawh dang thawn luh phalsak turin a ngen a, mahse an tan a him rih lo tih an hrilh niin a sawi.