Biden-a'n inkahhai puang turin Israel leh Palestinian ngen
US president Joe Biden chuan Israel leh Gaza Strip-a Palestinian pawlte chu inkahhai puang turin a ngen.
Israel leh Gaza-a Hamas pawlte chu kar khat chuang an inkap tawh a ni. Thawhṭanni zan khan Gaza aṭang in rocket eng emaw zat chu Israel ramah kah a ni leh a, hei hi Israel sipaite chuan nimin zing khan chhang letin, Gaza Strip-ah airstrike an nei zui ve leh nghal bawk.
Ram hrang hrangte chuan inbeihna titawp turin an ngen a, US President pawhin rocket hmanga beihna laka a ram venhimna tura a hmalakna chu US chuan a thlawp a ni tih a sawi a, hemi rual hian inbeihna tihtawp a nih theihna tura inkahhai puang tura a duh thu a sawi.
US hian United Nations Security Council-a inbeihna thleng mek titawp tura ngenna thuchhuah siam tum chu ṭum hnih a lo dang tawh.
Israel Defence Forces (IDF) chuan nimin zinga beihpui an thlaknaah hian Gaza-a Hamas tunnel, kum 15-a thui chu an bomb chhia tih a sawi. Mahse beihpui an thlaknaah hian mihring thi an awm lo nia sawi a ni.
Israel hnenah ralthuam USD mtd 735 man hralh remti
President Biden kaihhruai US sorkar chuan Israel hnenah ralthuam, US dollar maktaduai 735 man hralh a remti niin US media-te chuan an tarlang.
US hnena ralthuam lei tir tum chungchang hi Gaza Strip-a inbeihna a thlen hma, May 5 khan Congress hnenah hriattir a lo ni tawh a ni. Ralthuam lei tir tur zingah hian joint direct attack munitions (JDAM) leh GBU-39 small diameter bomb-te pawh a tel.