Myanmar sipaiten mi 800 chuang that tawh

Myanmar sipaiten February 1-a civil sorkar rorelna an hneh­chhuh hnuin mipui lungawi lo pungkhawm zinga mi 800 chuang an that tawh niin Myanmar activist-te chuan an sawi.

Nikuma inthlanpui neiha Aung San Suu Kyi kaihhruai sorkar hneh taka thlan tlin leh an nih danah sipai chuan thil dik tawk lo a awm niin an sawi. Civil sorkar thuneihna an hnehchhuh hnuah Suu Kyi leh a party, National League for Democracy official eng emaw zat an man tawh a ni.

Sipaite chuan khawpuia lungawilohna lantirtute chungah zahngaihna lantir duh loin an che rawng chho zel nia sawi a ni a, sipai leh nawrh huaihawt thlawptu helpawlte pawh ramriah an intibuai fo bawk.

Thawhṭanni thleng khan sipaite kut tuarin mi 802 an thi tawh a, hei hi an hriatchian theih chin niin hei ai pawh hian an la tam daih thei a ni tih activist group pakhat Assistance Association for Political Prisoners chuan a sawi.

Hetih lai hian sipai lam chuan mitthi zat an sawi hi a dik lo niin an sawi ve thung. Buaina chhuakah hian security force ṭhahnem takin nunna an chan ve bawk niin an sawi a ni.

Sipai hnena thuneihna pum­hlum pekna, martial law chu kar hmasa khan Mindat-ah puan a ni a, hemi hnu hian sipaiten laipui leh helicopter hmangin helpawl din thar, Chinland Defence Force an bei zui a ni. Sipaite beihna avang hian khaw mipui eng emaw zat chu ei tur tlachhamin an awm a, mi 5,000 - 8,000 chuan himna zawngin khua an chhuahsan tawh bawk.

United States leh Britain chuan helpawl an beihnaah civil mite tawrhna thlen lo zawnga che turin sipaite chu an ngen a, Suu Kyi lamṭang National Unity Government pawhin ramdangte puihna an dil a ni.