US-in Covid vaccine dose mtd 20 ram dang tan pe dawn

United States president Joe Biden chuan khawvelin hripui leng mek a dona kawngah pui turin ram dang hnenah kar ruk chhungin Covid vaccine dose maktaduai 20 an pe leh dawn tih Thawhṭanni khan a sawi. June thla tawpah chuan vaccine an thawn chhuah hi dose mtd 80 a tling thei dawn a ni.

Ram hrang hrangten vaccine chuang bang an neihte chu dinhmun harsa leh rethei zawkte tana thawn turin Biden kaihhruai sorkar an nawr hnuah he thutlukna hi an siam a ni.

President Biden chuan hri leng do meknaah US chuan July thlaah hmahruaitu a nih zia a tinghet leh dawn a ni tiin, vaccine an thawn chhuah tur chu ram dangte karna atana ti an ni lo tih a sawi nghal bawk.

"Kan vaccine pek tur hi ram dang pek tawh aiin a let nga in a tam dawn. Russia leh China chuan dose maktaduai 15 an pe tawh. Russia leh China chuan an vaccine avangin ram dang thunun an tum nia sawite pawh a awm. Keini chuan kan vaccine hi ram dang duhsakna dawng tumna atan hman an tum lo, " tiin Biden chuan a sawi.

White House chuan khawi ramah nge vaccine hi an thawn chhuah dawn tih a sawilang lo a, mahse President Biden chuan hri leng vanga harsatna nasa tak tawk mek India pui turin an theih anga puih an tum thu an lo sawi tawh a ni.