Israel-in Gaza border crossing a khar

Israel chuan Gaza border crossing, Karem Abu Salem (Kerem Shalom) chu nimin khan a khar.

Israeli Coordinator of Government Activities in the Territories (COGAT) chuan Gaza Strip-a chengte chhawmdawlna thawn luhna turin border crossing hi hawn a ni tih a puang a, mahse Thawhlehni khan helai bial hi mortar hmanga beih niin Israel sipai pakhatin hliam an tuar a ni. Hei vang hian border crossing pawh khar a nih leh nghal thu COGAT chuan a sawi a, Gaza tana chhawmdawlna phurtu, international aid truck eng emaw zat pawh din tir nghal an ni.

Norwegian Refugee Council-a Middle East media adviser, Karl Schembri chuan Gaza border crossing pahnih, Karem Abu Salem leh Beit Hanoon-te chu khar an nih chuan Gaza Strip-a chengte chu up hlum an ni mai dawn a ni tiin, chakkhai thawn luhna turin crossing-te hi hawn reng a ngai a ni, a ti. Mipuiten chhawmdawlna an dawn theihna atan kawng ruahman a, inkahhai puan thuai a ṭul tih sawiin, bomb thlak a nih reng chhung chuan mipuite mamawh semchhuah a theih loh a ni, a ti.

United Nations chuan Israel sipaiten beihpui an thlakna avangin Gaza Strip-a building 450 vel a chhe tawh a, heng zinga 132 chu luah chhunzawm tlak lohin a chhe vek tawh niin a sawi. Mi 52,000 chuang chu chenna mumal nei loin an awm tawh a, an zinga mi 47,000 vel chu Gaza-a UN enkawl school 58-ah an khawsa mek tih United Nations Office for the Coordination of Humanitarian Affairs (OCHA) chuan a tarlang.

School-ah mi tam tak an awmkhawm avangin Covid-19 hri darh leh tui hri a len mai hlauhthawnna pawh a nasa hle tih Word Health Organisation thupuangtu Margaret Harris chuan a sawi.

UN General Assembly-in Israel-Palestine buaina sawiho dawn
United Nations General Assembly chuan vawiin hian Israel leh Palestinian inkara buaina chhuak mek chungchang ngaihtuahin inhmuhkhawm pawimawh an nei dawn.

General Assembly President Volkan Bozkir chuan May 17 khan Israel-Palestinian inkara kum tam tak chhung an inhmelmakna awm chu tun kar hnih chhung hian zual lam a pan nasa hle tih a sawi.

Member 15 awmna U.N. Security Council hian Pathianni khan Israel-Palestinian buaina avang hian an lo inhmukhawm tawh a ni. Hemi ṭum hian he buaina thleng mek chungchanga thuchhuah siam an tum chu Israel ram ṭhianṭha, US-in a duh loh avangin an siam thei ta lo a ni. Mahse China chuan thuchhuah siam a nih ngei theihna atan Council chu a nawr zui zel dawn tih a sawi thung.