France-ah khuahkhirhna an thlahdul zel

France chuan an rama hri leng vanga khuahkhirhna a lo siam tawh chu a thlahdul chho zel a, bar, dawr leh vantlang hmun pawimawhte chu hawn an ni leh thei ta.

Nilaini aṭang khan outdoor restaurant-ah mi paruk chin awmkhawm phal a ni ṭan a, zan dar 7 aṭanga curfew hman ṭan pawh dar 9-ah sawn hlat a ni bawk..

Hetih lai hian medical expert ṭhenkhat chuan an rama Covid-19 kai thar an pun zel vangin an hlauthawng ru hle thung a, hri kai hmuh thar hi nitin mi 13,000 zel awm anga chhut an ni. Mahse hei hi thla hmasa lam ai chuan a tlahniam tawh hle thung a, April thla kha chuan ni khatah hri kai hmuhchhuah hi 40,000 chuangte an ni.

France vaccination campaign chuan kar liamta chhung khan hma an sawn chak hle a, mi maktaduai 20 chuangin vaccine dose khatna an la tawh a, mi maktaduai 9-in dose an la kim tawh bawk.

Sorkar chuan May thlaah mi maktaduai 20 hnenah vaccine dose khatna pek hman tumin ruahmanna a siam.

Lockdown thlahdul dan
Thla tam tak an inkharkhip hnuin Nilaini aṭang khan khuahkhirhna hi thlahdul ṭanin restaurant, cafe, essential shop, theatre, cinema hall-te hawn an nih bakah museum leh sport venue-te pawh tlawh phal a ni tawh bawk. France mipuite chuan nunphung pangngai an zawh chho leh thei leh dawn ṭan ta a ni.

A tahtawlin khuahkhirhna siam hi thlah dul a ni a, sumdawnna ṭhenkhat tan erawh khuahkhirhna khauh tak kalpui a la ni. Finance minister Bruno Le Maire chuan an rama sumdawnna hmun te intahtawla hawn chu an ram economy in ngai a awh chhoh zel nana tih a nih thu a sawi.

Bar leh restaurant-te chu vantlang tana hawn ni tawh mah se mihring lengzat aṭanga 50% bak awm phal a la ni lo. Cinema leh theatre-ah chuan mi 800 aia tam lo emaw mihring leng zat aṭanga 35% bak a chhunga awm phal a ni lo.

France hian May 3 khan ram chhunga zin kual khapna a siam chu a lo hlip tawh a, mipuite chu an chenna in aṭanga km 10 bialah phalna lak ngailo in veivah phalsak an ni tawh bawk.

Secondary school zirlai tan zirna in hawn ani leh tawh a - nursery leh primary school-te pawh a hma khan hawn a lo ni tawh bawk a ni. Sorkar ruahmanna angin zan curfew pawh June thla tawp hmaa hlih vek tum a ni.

France-ah hian coronavirus kai hmuhchhuah tawh maktaduai 5.9 awmin, hri vanga thi 108,201 an awm tawh tih John Hopkins University chuan a tarlang.