China-in dawt sawiah Nancy Pelosi a puh

China chuan US House of Repre­sentative speaker Nancy Pelosi-chu human rights behchhana Beijing Olympics boycott tura US leh khawvel ram dangte a ngen chungchangah, Pelosi chu dawt hlang sawiah a puh.

Nancy Pelosi chuan Thawhlehni khan 2022 Winter Olympics, Beijing-a neih tur chu China-in human rights a bawhchhiat avangin US palai chu boycott turin a phut a, hei bakah hian he olympic chhim tura China-a ram hruaitute kalte chuan an dikna an hloh dawn a ni, a ti.

"China sorkar chawimawi turin ram hruaitute chu China ramah kal lo ngam ang u. China rama inthahna nasa tak a thlen laiin an hruaitute chu an thutnaah an thu mai mai thei a ni. Heti chunga China rama in kal a nih chuan, human rights humhalh chungchang sawi theihna in nei dawn ami", tiin Pelosi chuan ram dang hruaitute pawh a ngen nghal bawk.

China-in Olympics a thlen dawn avang hian an rama Uyghur Muslim leh hnam/sakhaw tlem zawkte hrek leh an laka rawng taka chea China puhna thawm a ring chho leh ṭan hle.

Pelosi thusawi avang hian China chu a lungawi lo hle a, Uyghur minority chung changa an puhna chu thu dik lo a nih thu leh, heng hnam ho awm mekna internment camp-te chu vocational training centre a nih thu a sawi. Foregin ministry thupuangtu Zhao Lijian chuan, "US mi ṭhenkhat thusawi chu dawt hlang hlak, midang thu dik lo hrilh tumna a ni," tiin US politician-te chu Olympics political game tenawm tak khelhna atana hmang lo turin a ti nghal bawk.

Hetih lai hian rights group chuan Uyghur maktaduai khat chuang leh Xinjiang huam chhunga minority dangte chu kum rei tak chhung chu camp-ah dah an ni tawh a, an sakhuana leh zalenna te chu China thuneituten an rahbeh sak niin a sawi.