Israel-Gaza : Hamas official-in inkahhai puan thuai beisei

Gaza Strip-a rorellai, Hamas senior official Moussa Abu Marzouk, chuan Israel leh Palestinian-te chuan inkahhai an puan theih thuai a beisei thu a sawi.

Hetih lai hian Irael prime minister Benjamin Netanyahu chuan Israel mipuite an him chian hma chuan Gaza Strip-a beihpui thlak chu kalpui chhunzawm zel a tum tih Nilaini khan ala sawi thung.

Nimin zing khan Israel sipaite hian Gaza hmarlama Hamas hmunte an beih chhunzawm leh a, Palestinian lam pawhin rocket hmangin Israel an kap zui ve leh bawk a ni.

Israel leh Palestinian-te inbeihna avang hian Gaza Strip-a mi 227 an thi tawh a, an zingah hian hmeichhia leh naupang 100 chuang an tel niin Hamas health ministry chuan a tarlang. Mahse Israel chuan thi zingah hian helpawl mi leh sa 150 chuang an tel niin a sawi thung.

Palestinian-te beihna avangin Israel ramah mi 12 an thi tawh a, an zingah hian naupang pahnih an tel. Israel chuan kar hnih dawn an inbeih chhung hian Gaza Strip aṭang hian Israel lamah rocket 4,000 vel kah chhuah a ni tawh tih an sawi a ni.

Nilaini khan US president Joe Biden chuan Israel PM Netanyahu chu phone-in a be leh a, boruak ṭha a awm a, inkahhai an puan theih a beisei thu a hrilh. Israel-Gaza inbeihna thlen hnuah Biden hian Netanyahu hi ṭum li a biakna a ni tawh. Hetih lai hian Nilainia UN Security Council ṭhukhawmin inkahhai puang tura phutna resolution siam an tum chu US-in a thlawp loh avangin an siam leh thei ta lo a ni.