FORTUNE : World’s 50 Greatest Leaders 2021 Jacinda Ardern pakhatna a ni
American magazine lar Fortune-in World’s 50 Greatest Leaders 2021 list a tihchhuahah New Zealand prime minister Jacinda Ardern chu pakhatna a ni a, mRNA Pioneers chu pahnihna niin PayPal CEO Dan Schulman chu pathumna a ni. Kumin list-ah hian Covid-19 dona kawnga thawk ṭhate an lang nasa a, India ram aṭangin Serum Institute of India (SII) head Adar Poonawalla chu langin zaithiam Dolly Parton chu 12-na a ni bawk.
1. Jacinda Ardern
New Zealand prime minister 40-na hi ram hruaitu ṭha tak a ni a, Covid-19 hripui len hma pawh khan firfiak beihna a do letna kawngah leh tlangkang vanga an ram buaina a chinfelna kawngah fak a hlawh ṭhin hle. Nikum lamah Covid-19 hripuiin khawvel nasa takin a chawkbuai a, chu hripui doletna kawngah chuan a che ṭha lehpek hle a, hri kai an tlemna tur mai ni lo, an rama hri kai an awm lohna turin a thawh hlawk hle.
Fortune chuan heng kawng hrang hranga a hmalaknate hi tarlangin, climate change leh gender-equality chungchanga a hmalaknate pawh an tarlang bawk.
Kumin March thlaah khan a hmalakna hnuiah New Zealand chu banks, investment manager, leh insurer-te climate change nghawng lo zawnga an sumdawna kalpui tura tih ram hmasa ber an ni. Heng a hmalakna hrang hrang avang hian Fortune chuan Jacinda Ardern chu kumina khawvela hruaitu ṭha berah an puang a ni.
2. mRNA Pioneers
Nikum kumtir lam thleng kha chuan delivery system messenger RNA (mRNA) tia hriat chu tam taka hman a nihna tura pawm a la ni ngai lo. Mahse Covid-19 vaccine siamtu Pfizer/BioNTech leh Moderna-te erawh chuan mRNA hi an hmang ṭangkai hle a, US-ah ringawt mRNA hmang hian vaccine donse makatduai 250 chuang an sem tawh.
Chumi a nih avang chuan mRNA Pioneers tiin Fortune chuan hemi hmanna kawnga hmalatute chu an list-ah pahnihnaah an dah a ni.
Thlalak an tarlan leh an chanchin an tarlan bikahte chuan Moderna CEO Stéphane Bancel, BioNTech cofounders Ugur Sahin leh Özlem Türeci-te bakah Pfizer CEO Albert Bourla-te chu an lang a, heng mite hmalakna hnuaia Covid-19 vaccine ram hrang hranga tam tak sem a nih dante chu an tarlang uar hle.
3. Dan Schulman
Dan Schulman company PayPal chu hrileng karah an che ṭha hle a, chumi avang chuan Fortune hian an list-a pathumnaah PayPal CEO Dan Schulman chu an dah a ni.
Hripuiin US economy che thei loa a siam lai khan PayPal hi ṭangkai taka hman niin, loan tenau pek chhuahna atan te, midang ṭanpuina tur sum peipunna atan leh kawng hrang hrangah ṭangkai takin an hmang. George Floyd thih avanga chi inthliarna nasa taka dodalna a awm lao khan midumte'na an enkawl sumdawnna ṭanpuina atan $mtd 300 lai an pe bawk.
4. Dr. John Nkengasong
Dr. John Nkengasong hi Ethiopia-a hmunpui nei Africa Centers for Disease Control and Prevention (CDC) hotupa a ni a, CDC hi African Union pecialized technical branch a ni nghe nghe.
Africa-a ram 54 an ṭanrualna tura sulsutu pawimawh a ni a, heng ram hrang hrang thawh hona avang hian Covid-19 vanga Africa ram buaina pawh a ziaawm phah hle niin Fortune chuan tarlangin, ram hausa zawk, US-te ai pawhin hrileng dona kawngah an hlawhtling zawk niin an tarlang hial.
Hri a len ṭantirh khan mi thaimte chuan Africa ram chu nasa taka a nuai an ring a, mahse an beisei loh takin Africa ramte chu ram hausa zawkte nen khaikhinin hri dona kawngah an hlawhtling ta phian a ni, an ti.
5. NBA Rescuers
Fortune chuan hrileng kara NBA a parvul theihna atana beitu NBA commissioner Adam Silver; Michele Roberts, National Basketball Players Association (NBPA) executive director; leh Chris Paul, point guard lar leh NBPA president ni bawkte chu an list-a pangnaah an dah.
Nikum March 11 khan NBA season kal lai mek chu Covid-19 vangin tihtawp a ni a, chumi hnu chuan Silver, Roberts, leh Paul-te thawkho chuan $mtd 180 sengin bubble plan an siam a, chumi avang chuan game 172 lai chu player pakhat pawh Covid-19 kai awm loin an khel leh thei a ni.
6. Jessica Tan
Covid-19 hripui vanga kum 2020 kumtir lama China nasa taka a buai lai khan private-sector tech company-te an che ṭha hle a, chung zinga che ṭha ber chu Ping An Group an ni, a tih theih awm e.
Ping An Group hi an co-CEO Jessica Tan thluak hmangin an thawk ṭha hle a, an “technology plus finance” strategy hmangin an company telehealth app Ping An Good Doctor chu an duang a, chu chu China mipuite'n an chhawr ṭangkai hle. He app hi mi tluklehdingawm 1.11 laiin an tlawh niin an tarlang hial.
Hei mai bakah hian Ping An HealthKonnect division chu China-a Covid-19 tam takin an test theihna tura hmalatu hmasa zinga mi an ni bawk.
7. Justin Welby
Archbishop of Canterbury, Justin Welby hi Kohhran leh khawtlang kaldan phung thlak tura nawrtu langsar a ni.
Church of England kohhran hruaitu leh khawvel puma Anglican Communion hruaitu hlum hi climate change chungchanga hmalatu langsar a ni a, Britain rama kohhran hruaitu langsar ni mah se British sorkar chu insiam ṭha tura zilhtu leh Brexit chungchangah pawha ṭawng chhuak ngam a ni, tiin Fortune chuan an tarlang.
8. Stacey Abrams
Stacey Abrams hi American politician a ni a, Fair Fight Action dintu niin, kum 2018-ah khan Georgia gubernatorial election-a African-American Democrat nominee niin, hmeichhia major-party gubernatorial nominee ni thei hmasa ber a ni.
Nikum US president inthlana Georgia-a vote tlak ṭhat chhanah khan a sulsutu ber nia ngaih a ni bawk.
9. Reshorna Fitzpatrick
Reshorna Fitzpatrick hi Pastor a ni a, tisa leh thlarau lam chaw hluitu lar a ni.
Kum thum liam taah khan North Lawndale church bulah community garden bul a ṭanpui a, chutah chuan Pathian thu hril nghalin, Thawhṭanni apiangin a pasal Bishop Derrick Fitzpatrick nen a duh apiang tana ei tur buatsaihtu a ni bawk. Heng an hmalaknate hi Covid-19 lai phei chuan a ṭangkai hle a ni.
10. Adar Poonawalla
Serum Institute of India (SII) head Adar Poonawalla chu Fortune World’s 50 Greatest Leaders 2021 list-ah 10-na a ni.
SII hi khawvela vaccine siamtu lian ber a ni a, kuin chhung hian vaccine dose tluklehdingawn 2 tal pek chhuah hman an tum a, vaccine siamtu dang zawng aiin vaccine an pe chhuak hnem tawh zawk.
Covishield leh Covavax siamtu company niin Covavax hi American firm Novavax nen thawkduna an siam chhuah a ni a, Covishield phei chu World Health Organization in vaccine a pawm hmasak ber zinga mi a ni nghe nghe.
World’s 50 Greatest Leaders 2021 list-a langte chu:-
1 Jacinda Arderns
2 mRNA Pioneers
3 Dan Schulman
4 Dr. John Nkengasong
5 NBA Rescuers
6 Jessica Tan
7 Justin Welby
8 Stacey Abrams
9 Reshorna Fitzpatrick
10 Adar Poonawalla
11 Dolly Parton
12 Mike Sommers and Vicki Hollub
13 Anthony Tan and Hooi Ling Tan
14 Dr. Seth Berkley
15 Dr. Aparna Hegde
16 Willie Ray Fairley
17 Nury Turkel
18 Kate Bingham
19 MacKenzie Scott
20 Francis X. Suarez
21 Xie Zhenhua
22 Tom Brady
23 Dr. Ala Stanford
24 Timnit Gebru
25 Tim Scott
26 C. C. Wei
27 Craig Jelinek
28 Sara Blazevic and Varshini Prakash
29 Diana Berrent
30 Dr. Ching-Hon Pui
31 Malala Yousafzai
32 Adena Friedman
33 Michael Regan
34 C. Nicole Mason
35 Reginald Dwayne Betts
36 Kenneth Chenault
37 Megan Rapinoe
38 Eugene Goodman
39 Ben and Erin Napier
40 Fawzia Koofi
41 Nathália Rodrigues
42 Guy Fieri
43 Aurora James
44 Timothy Renick
45 Epidemiologists of Social Media
46 Naomi Osaka
47 Catalin Tolontan
48 Strive Masiyiwa
49 Demis Hassabis
50 Ashish Jha