China ramri bulah Myanmar sipai leh hel inbei

Myanmar leh China inrina bulah nimin khan Myanmar sipai leh sipai rorelna dodaltu thlawptu, helpawl ṭangrualte an inkap niin Myanmar media-te chuan an tarlang.

Sipei leh helbo inbeihna hi China nena an inkalpawhna hmunpui ber pakhat Muse khuaah a ni a, zingkar lama thleng niin DVB broadcaster leh Khit Thit media chuan an tarlang. Khit Thit Media hian inbeihna hmuna civil mi motora silai kahna hnuhma ṭhahnem tak awm thlalakte pawh a tilang. He inbeihnaah hian thi an awm hriat a ni lo.

He thil thleng chungchangah hian sorkar thupuangtu emaw, helpawl pali inzawm, Northern Alliance thupuangte emaw chu biak pawh theih an ni lo.

Northern Alliance zinga tel, Kachin Independence Army chuan Myanmar hmarthlang lam, Muse aṭanga km 320 a hla, Indian border bula sipaite post chu Inrinni khan an lo bei tawh bawk.

February 1-a civil sorkar rorelna hnehchhuh a nih hnu khan, nitin ram chhung hmun hrang hrangah sipai rorelna duh lohna lantirin nawrh huaihawt reng a la ni. Hetih lai hian helpawl eng emaw zat chuan nawrh huaihawtte hi an thlawp thu sawiin, sipai nena inkahna pawh a thleng ta fo a ni. Nawrh huaihawt reng a nih avangin damdawi-in, school leh sumdawnna hmunte pawh a nghawng na tawh hle.

School zirtirtu 1,25,000 chuang chu civil disobedience movement thlawptu zinga an tel avangin an hna aṭanga suspend an nih thu Myanmar teacher's federation official chuan a sawi.

Myanmar-a tualchhung buaina chhuah aṭang khan mi 815 chuangin nunna an chan tawh tih Assistance Association for Political Prisoners activist group chuan a sawi bawk. Sipaite hian mi 4,300 vel an hreng mek niin an sawi bawk.

Mahse sipai lam chuan hei hi an pawm lo thung a, sipai hotu lu ber Min Aung Hlaing chuan Inrinni khan tualchhung buaina thleng vanga thi chu mi 300 niin, an zingah hian police 47 an tel niin a sawi.

Min Aung Hlaing chuan Aun San Suu Kyi-i hriselna a ṭhat thu leh, a inah him taka a awm thu a sawi a, court hmaa a inlan thuai tur thu a sawi bawk. Vawiin hian Suu Kyi thubuai hi ngaihtuah ṭan a ni dawn a, vawiina a thubuai an ngaihtuah tur zingah hian dan loa inbiakpawhna khawl (walkie-talkie radio) kawl rua puh a nih chungchang pawh a tel. Suu Kyi hi man a nih hnuah thubuai eng emaw zat siam belh sak a ni tawh. A hmaa a thubuai ngaihtuahnaah video link kaltlanga chauha a inlan phalsak a ni a, a lawyer-te pawh a hrana a biak phalsak an ni ngai lo.