DR Congo-a tlang kang vangin mi tam tak tlanchhia

Democratic Republic of Congo-a Goma khaw bula Mount Nyiragongo tlang kang nasa tak avangin mi sang tel himna zawngin an tlanchhia.

Inrinni zana Mount Nyiragongo tlang kang aṭang invawrh chhuak avang hian mi maktaduai hnih vel chenna, Goma khaw chung chu meikhu chhah takin a tuam a ni. He tlang hi Goma khua aṭanga km 10 vela hlaa awm a ni a, kum 2002 khan tlang kang vang hian mi 250 in nunna chanin, mi 1,29,000 vel chenna in nei loin an lo awm phah tawh bawk.

Nimin zing khan Goma khuaa cheng mi tam tak chu an mutbute nen Rwanda border lamah an tlanchhia a ni. Rwanda ram thuneitute chuan mi 3,000 vel chu ramri kanin an ramah an tlan lut tawh tih an sawi a, heng mite hi school leh inkhawmna hmunahte awmtir an ni rih dawn tih an sawi.

Hmun tam takah electric supply an nei lo a, Goma leh Beni khawpui inkalpawhna highway pawh tlang kang avanga lei sa tawlh chhuakin a khuh vek a ni. Hmun ṭhenkhatah lir pawh a nghing nia sawi a ni bawk.

Tlang kanna bula awm, Virunga National Park official chuan kum 2002-a tlang kang thlen dan nen khan a in ang hle nia sawiin, a bul hnaia awmte chu khawmuang loa insawnchhuak vat turin a ti a ni.