Myanmar election commission-in Suu Kyi-i party ṭhiah tum

Myanmar sipai sorkarin election commission a ruat thar chuan Aung San Suu Kyi-i party, National League for Democracy Party (NLD) chu nikuma November thlaa inthlanpui neiha thil dik tawk lo tia puhin, an party hi ṭhiahsak a tum tih Myannar Now chuan a tarlang.

Myanmar Now report chuan, Union Election Commission (UEC) chairman Thein Soe chuan, "NLD-in inthlan a kalpui dan kha dan kalh a ni a, hei vang hian party registation hi kan ṭhiatsak dawn a ni," tia a sawi thu a tarlang. Inthlanpuia dik lo taka thiltite chu ram phatsantu anga ngaih an nih thu leh, an chungah action pawh an lak tur thu a sawi bawk.

He report chungchangah hian sipai sorkar thupuangtu leh, democracy thlawptute din national unity government (NUC) aiawhte chuan engmah an la sawilang lo. Mahse sipai sorkar thlawp, Union Solidarity and Development Party thupuangtu chuan meeting an neih ngei thu sawiin, an thutlukna siam dan erawh a hriatpui loh thu a sawi thung.

Sipaite hian February 1-a civil sorkar thuneihna an hnehchhuh chhanah nikum inthlanpuia thil dik tawk lo a awm vang niin an lo sawi tawh a, sipai lamin complaint an thehluh chu hetih laia electoral commission chuan a pawmsak lo tih an sawi. Thuneihna an laksak hnuah inthlan pawh an buatsaih leh thuai tur thu an sawi a, mahse a hun tur erawh an la puang lo.