Japan-in vaccine pek runpui kalpui ṭan

Japan chuan an rama hri lengin zual lam a pan zel laiin, nimin aṭang khanTokyo leh Osaka khawpuia vaccine pek chhuah runpui a kalpui ṭan.

Khawpuiah hian sipaiten vaccine pekna tur centre eng emaw zat siamin, heng aṭang hian nitin vaccine sang tel pek theih a ni dawn a, kum upa lam ngaih pawimawh hmasak an ni ang. Japan-ah hian an ram mipui 5% chuan vaccine an la kim tawh a ni.

Hri leng thawh hnihna hian Japan healthcare system a chawk buai hneh hle a, damdawi-in tam takah khum leh ventilator an indaih lo a, July thlaa Tokyo Olympics neih tura ruahman pawh ṭhulh tura ngenna mipui lam aṭangin a sang tawh hle.

Japan-a hmun tam zawk chu state of emergency hnuaiah an awm mek. An ramah Covid-19 kai hmuhchhuah tawh 700,000 awmin, hri vanga thi 12,000 an awm tawh bawk.

Vaccine semchhuah runpui hi Japan defence force in an kalpui dawn a, thla thum chhungin an kalpui ang.

Official-te chuan Tokyo-ahmi 5,000 leh Osaka-ah 2,500 te chu nitin vaccine pek an tum a, June leh July thlaah chuan a leta pek theih an tum a ni. Kobe leh Nagoya khawpuiah pawh vaccine pek runpui hi neih tum a ni a, thuneitute chuan kum 65 leh a chunglam chin chu July ral hma ngeiin vaccine pek kim vek hman an tum.

Japan hian February aṭang khan vaccine hi a pe ṭan ve chauh a, ram dang zawng aiin an pe chhuak har a ni.