Covid-19 vangin health worker 1,15,000 an thi tawh : WHO Chief

Covid-19 hri a len tirh aṭangin khawvel pumah healthcare worker mi 1,15,000 aia tlemlo in nunna an chan tawh niin World Health Organization (WHO) director-general Tedros Adhanom Ghebreyesus chuan Thawhṭanni khan a sawi.

World Health Organisation main annual assembly hawnna inkhawmah Ghebreyesus chuan he thu hi sawiin, khawvel ram hrang hranga hripui leng dona kawnga healthcare worker-te inpekna chu fakawm a tih thu a sawi. Ram hrang hrangah chak zawka vaccine pek chhuah a ṭul thu a sawi nghal bawk a ni. .

"Khawvel hmun hrang hranga healthcare worker-te chuan thla 18 dawn chu thih leh dam inkarah hun an hmang tawh a, nunna ṭhahnem tak an chhanhim piahlamah hri vanga thi tate tan pawh khan theihtawp an chhuah a ni. Ṭhenkhat chuan hri an kai phah hial a, report hi dik thlap ni lo mah se health care worker 1,15,000 vel chuan midang tana an thawhna avangin an nunna an chan a ni," tiin WHO hotu chuan a sawi.

Ghebreyesus chuan health worker tam tak chuan hri kaite an enkawlna kawngah protective equipment an dawn ṭhat loh bakah, vaccine an dawn loh bawk vangin an invenghim ṭha tawk thei lo a, hei hian anmahni pawh a timangang hle a ni, a ti.

Ram 10-in Covid-19 vaccine 75% kawl
WHO hotu chuan Covid vaccine siamchhuah tawh zinga 75% chu ram 10-ah chauh kawl a ni tih sawiin, rualkhai zawka vaccine sem chhuah a ṭul thu a sawi nawn leh.

Tedros chuan vaccine siamchhuahte hi daihzai taka an sem chuan health worker leh kum upa indaihkhawp tur a awm thu sawiin, "Khawvela vaccine siamchhuaktu leh leitur ram tlemte hian kan hma hun an thuhnuaiah an dah a ni," a ti. Vaccine stock nei ṭha ramte chu midang tana luangchhuak tur leh vaccine tam zawk siamchhuah a nih theihna atana ṭan la turin a sawm.

WHO chuan pawl dang nena ṭanghoin global vaccine-sharing programme Covax an din a, mahse sum an dawn ṭhat tawkloh avangin vaccine an duhkhawp ang an hmu thei lo, hei hian ram rethei zawkten vaccine an dawn tur pawh a tihkhawtlai phah a ni.

Tedros chuan ram 125 ah dose maktaduai 72 an thawn chhuak tawh a, heng ram zinga mipui cheng 1% bak a phuhru zo lo erawh pawi a tih takzet thu a sawi.

WHO Chief chuan vaccine dawn leh lak inrualkhai lo lutuk siamṭhat thuai a ṭul thu sawiin, member ramte chu September thlaah chuan an ram mipui 10% tal vaccine pe hman turin a ngen a, kumtawpah chuan mipui 30% talin vaccine an dawn hman a beisei thu a sawi.