Myanmar sipaiten American Journalist an man

Frontier magazine mana­ging editor, United States mi Danny Fenster chu Myanmar a chhuahsan tur chu sipaiten Yangon airport-ah man in, Insein tan-inah khung a nih nghal thu Myanmar chanchinbu chuan a tarlang.

Fenster hi Detroit-a piang niin, Myanmar Now, inde­pendent news group pakhat tan a thawk ṭhin a ni. February 1-a civil sorkar paihthlak anih hnua sipaiten rampawn mi journalist an man palina a ni.

Freelancer Robert Bociaga, Poland leh Yuki Kitazumi, Japan te chuan an man an lo tawk tawh bawk. Nathan Maung, US khua leh tui nihna nei chu chanchin diklo puangzara puhin sipaiten a office-ah luhkhungin an lo man tawh bawk a, thla tir khan a thubuai ngaihtuah-in court-ah a inlan tawh a ni.

Myanmar sipaite chuan sipai rorelna duhloa lungawilohna lantirtute chu an chet dan azir zelin an lo dang chat ve zel. Independent local media te chu an office khar tura thu pek an ni tawh a, journalist 80 hreng mekin an zinga a zahve dawn chuan an thubuai ngaihtuahsak an la ni lo.

Khawvela press mite tana zalenna sualtu Committee to Protect Journalist (CPJ) chuan Fenster chu thu delhkilh awmloa chhuah nghal turin an phut thu an sawi.

Fenster hian Frontier Myanmar hi August 2020 khan a zawm. A lo thawhna ṭhin, Dateline Detroit chuan US-a a chhungte a hmu tura kal a tum chu sipaiten hian an man niin a sawi.

Frontier dintu leh chief executive ni kawp Sonny Swe chuan United States Embassy chuan Fenster man a nih thu hi hre tawhin, a chungchang pawh a ngaihven zui nghal tih a sawi bawk.