Israel-in Gaza-a chhawmdawlna thawn luh phalsak
Israel chuan Gaza Strip-a chhawmdawlna ṭhenkhat leh Covid-19 vaccine thawn luh a phalsak a, chhawmdawl hna thawktute an luh a remti bawk. Hetih lai hian United Nations chuan Gaza luhka zawng zawng chu hawng vek turin Israel a ngen.
UN Office for the Coordination of Humanitarian Affairs (OCHA) chuan Gaza crossing zawng zawng chu hawn vek a ṭul tih a sawi. Fuel-te thawnluh a ngai a, hei bakah hian Gaza Strip-a hri leng mek darh zel tur venna atana mamawhte thawn luh a ṭul niin a sawi.
OCHA chuan an thuchhuahah Gaza-a damlo dinhmun ṭha lo tak taka awm mek, hmun danga inenkawl ngaite tan leh ṭanpui ngai tak takten chhawmdawna an dawn thuai theihna atan crossing zawng zawng chu hawn a ṭul a ni, a ti.
Covid-19 vaccine hi Erez Crossing kaltlangin thawn luh a ni a, he luhkha hi international humanitarian staff tan hawn ni mah se, Palestinian-te tan erawh hawn a ni ve lo thung. Kerem Shalom crossing pawh chhawmdawlna phurtu motor tan bik hawn a ni bawk.
US-in chhawmdawlna pe dawn
US chuan Palestinian-te hnenah kum 2021 atan chhawmdawlna, US dollar maktaduai 75 a pe dawn tih secretary of state Antony Blinken chuan a sawi.
Chhawmdawlna pek tur zingah USD mtd 5.5 hi Gaza Strip-a disaster relief atan pek a ni dawn a, USD mtd 32 chu Gaza-a UN Palestinian aid agency-te hnenah pek a ni ang.
Blinken chuan Palestinian-te hnena chhawmdawlna an pek tur hi firfiak pawla a puan, Gaza Strip-a roreltu Hamas pawlten an lo pawhpen lohna turin an enzui zel dawn tih a sawi bawk.
US Secretary of State hian Mideast tour a nei mek a, Thawhlehni khan Jerusalem-ah Israel prime minister Benjamin Netanyahu nen inkawmin Israel-Gaza Strip chungchangte an sawidun. PM Netanyahu chuan Hamas-ten an inkahhai puan bawhchhia a, rocket hmanga Israel an kap leh a nih chuan a na thei anga an chhanlet nghal tur thu US official hi a lo hrilh.
Thawhlehni vek khan Blinken hian West Bank-a Ramallah-ah Palestinian president Mahmoud Abbas a hmu bawk. Egypt leh Jordan-te pawh a tlawh nghal dawn a ni.